Veteran futbolçular “Neftçi” - "Qrabağ" matçına gələcəklər
“Neftçi”nin yubileyi ilə bağlı silsilə tədbirlər Azərbaycan kubokunun yarımfinal mərhələsi çərçivəsində “Qarabağ”la keçiriləcək oyunda da davam edəcək.
1news.az-ın klubun rəsmi saytına istinadən məlumatına görə, martın 30-da təşkil olunacaq görüşü müxtəlif dövrlərdə “Neftçi”nin formasını geyinmiş veteran futbolçular da izləyəcəklər.
Onlar arasında hazırda ölkəmizdə yaşayan veteran futbolçularla yanaşı, ölkə xaricindən dəvət olunmuş – 1966-cı ilin bürünc medalçısı Nikolay Boqdanov, Olimpiya çempionu İqor Ponomaryov, komandanın heyətində ən çox oyun keçirmiş futbolçulardan biri Nikolay Smolnikov, 1971-ci ildə SSRİ çempionatında 33 ən yaxşı futbolçu sırasına düşmüş Vitali Şevçenko kimi əfsanəvi simalar da var.
"Neftçi” - "Qarabağ” matçından öncə keçiriləcək tədbirin bədii hissəsində azarkeşlər maraqlı görüntülərə şahidlik edəcəklər.
Qeyd edək ki, martın 30-da baş tutacaq “Neftçi” – “Qarabağ” oyunu saat 19:30-da start götürəcək.
1news.az
