Rusiya və İran Suriyaya raket zərbələri endirən ABŞ-ı tənqid ediblər – VİDEO

ABŞ-ın Aralıq dənizindəki hərbi gəmiləri Suriya ərazisində yerləşən aviabazaya və aerodroma raket zərbələri endirib.

1news.az-ın məlumatına görə, ABŞ tərəfi bu addımını Suriya ordusunun  İdlibdə kimyəvi silahdan istifadə etməsinə cavab olaraq atdığını deyib.

ABŞ hərbçilərinin Suriyanın Homs əyalətindəki “Əş-Şəyrat” aerodromuna azı 50 “Tomaqavk” raketi atdığı bildirilir.

ABŞ-ın iddiasına görə, Suriya ordusu qadağan edilmiş kimyəvi silahın istifadəsində məhz bu aerodromdan yararlanıb.

Qeyd edək ki, ABŞ-ın Suriyada obyektlərə raket zərbələri endirməsinə münasibətlər müxtəlifdir. Belə ki, bəzi ölkələr ABŞ-ı dəstəkləsə də, onu tənqid edənlər də var.

Rusiyanın BMT-dəki daimi nümayəndəsinin müavini Vladimir Safronkov ABŞ-ın Suriyaya zərbələr endirəcəyinin mənfi nəticələrə gətirib çıxaracağına dair xəbərdarlıq edib.  

İran da ABŞ-ın Suriya ordusunun aviabazasına hücumunu qəti şəkildə pisləyib. Rəsmi Tehran hesab edir ki, Suriya ordusunun mövqelərinə endirilmiş zərbələr terrorçuların mövqelərini möhkəmləndirəcək, habelə Suriyadakı durumu daha da çətinləşdirəcək.

Rusiya və İrandan fərqli olaraq Türkiyə ABŞ-ın Suriya rejiminə aid aviabazaya raket zərbələri endirməsini müsbət qiymətləndirib.

1news.az