Rəsmi şəxslərin olduğu dəfn mərasimində partlayış: ölən və yaralılar var
Əfqanıstanın paytaxtı Kabildə dəfn mərasimində törədilən silsilə partlayışlar nəticəsində ölənlərin sayı 20 nəfərə çatıb, 87 nəfər isə yaralanıb.
1news.az-ın məlumatına görə, partlayış zamanı dəfndə baş nazir Abdulla Abdulla və xarici işlər naziri Salahuddin Rabbani də iştirak edirdilər. Onların heç biri xəsarət almayıb.
Prezident Əşrəf Qəni Kabildə yeni terror hücumlarını pisləyərək xalqı birliyə çağırıb. Faciə bu gün şəhər qəbiristanlıqlarından birində cümə günü hökumət əleyhinə keçirilmiş nümayişdə həlak olan şəxsin dəfn mərasimi zamanı baş verib.
Xatırladaq ki, mayın 31-də Kabildə 100 insanın ölümü ilə nəticələnmiş terror aktı ilə bağlı etiraz aksiyası sonradan iğtişaşlara və polislə qarşıdurmaya çevrilmişdi. Mitinqdə iştirak edən mindən çox əfqanıstanlı ölkə rəhbərliyinin və güc strukturları başçılarının istefasını tələb etmiş, onları respublikada təhlükəsizliyi təmin edə bilməməkdə təqsirləndirmişdilər.
1news.az
