Bravo Çilini finala çıxartdı – FOTO – VİDEO
Rusiyanın Soçi şəhərində keçirilən FİFA Konfederasiyalar Kuboku-2017-də ilk yarımfinal oyunu keçirilib.
1news.az-ın məlumatına görə, son Avropa çempionu Portuqaliya ilə Çili yığmaları qarşılaşıb.
A qrupunda mübarizə aparan Kriştianu Ronaldolu Portuqaliya ilk görüşdə Meksika ilə qollu bərabərə (2:2) qaldıqdan sonra Rusiya (1:0) və Yeni Zelandiya (4:0) üzərində qələbə qazanaraq, yarımfinala lider kimi adlayıb.
Çili isə B qrupunu ikinci pillədə başa vurub. Cənubi Amerika təmsilçisi Almaniya və Avstraliya ilə (1:1) heç-heçə və Kamerun üzərində (2:0) qalibiyyət sayəsində yoluna davam edib.
Portuqaliya – Çili oyununa gəlincə, həm 90 dəqiqə, həm də əlavə olunmuş 30 dəqiqədə qapılara qol vurulmadığından qalibin adına penalti seriyasında aydınlıq gəlib.
Çilinin qapıçısı Bravo Portuqaliya millisinin üç futbolçusu - Quaresma, Moutinyo və Naninin zərbəsini dəf edərək komandasını finala yüksəldib.
Qeyd edək ki, Çili finalda bu gün saat 22:00-da start götürəcək Almaniya – Meksika görüşünün qalibi ilə qarşılaşacaq.
FİFA Konfederasiyalar Kuboku-2017
Yarımfinal
28 iyun
Portuqaliya – Çili - 0:0 (penaltilər: 0:3)
Babək Cahandarov
