“El-Klasiko”: “Real” Barselonadan qələbə ilə dönür – VİDEO

İspaniyada mövsümün ilk “El-Klasiko”su baş tutub.

1news.az-ın məlumatına görə, “Real” və “Barselona” İspaniya Superkubokunda üz-üzə gəlib.

Barselonada keçirilən ilk qarşılaşma Ernesto Valverdenin meydan sahiblərinin baş məşqçisi postunda debütü ilə əlamətdar olub. Lakin Zinəddin Zidan və komandası həmkarının “siftə”sini korlayıb.

Oyunda ilk qolu “Barselona”nın oyunçusu vursa da sevinən tərəf rəqib komanda olub. Belə ki, 50-ci dəqiqədə Pike avtoqola imza atıb. 77-ci dəqiqədə Lionel Messi 11 metrlik cərimə zərbəsi ilə tarazlığı bərpa edib – 1:1.

Bu qoldan üç dəqiqə sonra Kristiano Ronaldo komandasını hesabda irəli çıxardıb və qolunu qeyd edərkən formasını çıxartdığı üçün sarı vərəqə alıb.

Görüşün 82-ci dəqiqəsində simulyasiya etdiyi üçün ikinci sarı vərəqə alan portuqaliyalı ulduz görüşün hakimi tərəfindən meydandan qovulub.

Azlıqda qalmasına baxmayaraq oyunda vurulan növbəti qol da Madrid təmsilçisindən gəlib. Belə ki, görüşün sonuncu dəqiqəsində rəqib qapısına yol tapan Asensio “Real”ın 3:1 hesablı qələbəsini rəsmiləşdirib.

Beləliklə, səfərdə 3:1 hesablı qələbə qazanan “Real” avqustun 16-da evdə keçiriləcək qarşılaşma öncəsi böyük üstünlük əldə edib.

İspaniya Superkuboku

İlk oyun

13 avqust

“Barselona” – “Real” – 1:3

Qollar: Messi, 77-pen. // Pike, 50-öz qapısına, Ronaldo, 80, Asensio, 90

Babək Cahandarov