Tural Baxşıyev: Metanol zavodu avqustdan etibarən SOCAR-ın mülkiyyətinə keçib
“SOCAR Methanol” MMC yaxın gələcəkdə “Made in Azerbaijan” markası ilə yeni məhsulların istehsalını planlaşdırır.
Avqustdan etibarən SOCAR-ın mülkiyyətinə keçən zavodda bu il 250 min ton metanol istehsal edilməsi nəzərdə tutulub. Zavodda istehsal olunan məhsullar əsasən Türkiyə, bir sıra Qərbi Avropa və Aralıq dənizi hövzəsi ölkələrinə ixrac edilir.
“SOCAR Methanol” MMC-nin baş direktorunun müavini Tural Baxşıyev metanol zavodunun istehsal gücü və fəaliyyəti ilə bağlı son məlumatları məxsusi olaraq AZƏRTAC-la bölüşüb.
Həmin müsahibəni təqdim edirik.
- Tural müəllim “Made in Azerbaijan” markası ilə yeni məhsulların istehsalı nə vaxta planlaşdırılır?
- “SOCAR Methanol” MMC “SOCAR” brendi altında “Made in Azerbaijan” markası ilə son istifadəçilər üçün nəzərdə tutulmuş yeni məhsulların yaxın gələcəkdə buraxılması üzərində tədqiqat işləri aparır. “SOCAR Methanol” MMC istehsalın təkmilləşdirilməsi məqsədilə Azərbaycanın bir neçə elmi təşkilatı ilə - Azərbaycan Milli Elmlər Akademiyasının Neft Kimya Prosesləri İnstitutu, Beynəlxalq Ekoenerji Akademiyası, eləcə də digər elmi müəssisələr və araşdırma mərkəzləri ilə elmi-istehsal yöndə əməkdaşlığa başlayıb.
- Bu il üçün zavodda hansı həcmdə metanol istehsalı nəzərdə tutulur?
- Bu il üçün 250 min ton metanol istehsalı planlaşdırılıb. Artıq nəzərdə tutulan illik istehsal hədəfinin 75 faizi yerinə yetirilib.
- Zavodun illik istehsal gücü nə qədərdir?
- Metanol zavodunun maksimal illik istehsal gücü 650-700 min tondur. Yaxın gələcəkdə illik istehsalın 500 min tona çatdırılması bizim strateji hədəfimizdir.
- Hazırda Azərbaycandan hansı ölkələrə metanol ixrac edilir? Gələcəkdə ixracın genişləndirilməsi nəzərdə tutulubmu?
- Metanol zavodunda istehsal olunan məhsulun ixrac olunduğu ölkələr arasında Türkiyə, bir sıra Qərbi Avropa və Aralıq dənizi hövzəsi ölkələri üstünlük təşkil edir. Məhsulun ixracı ilə əsasən SOCAR-in Marketinq və İqtisadi Əməliyyatlar İdarəsi məşğul olur.
- SOCAR ötən il zavod üçün 394 milyon manat avans ödənişi edib. Lakin zavod 810 milyon manat qiymətləndirilir. Zavod üzərində nəzarət tam olaraq SOCAR-a nə zaman keçəcək?
- Metanol zavodu 2016-cı ilin noyabr ayından etibarən SOCAR-ın idarəçiliyi altında onun törəmə şirkəti olan “SOCAR Methanol” MMC tərəfindən idarə olunur. Bu ilin avqust ayından etibarən isə zavod SOCAR-ın mülkiyyətinə keçib.
- Zavodda nə qədər işçi çalışır?
- Hazırda zavodda 350-dən çox Azərbaycan vətəndaşı daimi işlə təmin olunub. İşçilərin orta yaş həddi 36 yaş təşkil edir.
S.Xankişiyeva
