Qazax xalqının qəhrəmanlıq eposu Azərbaycan dilində - FOTO
Qazaxıstanın Azərbaycandakı səfirliyində qazax xalqının qəhrəmanlıq eposu olan "Koblandı Batır" (Қoblandy Batyr) kitabının Azərbaycan dilində tərcümə edilmiş variantının təqdimat olub.
1news.az-a səfirlikdən verilən məlumata görə, Qazaxıstan prezidenti Nursultan Nazarbayevin “Gələcəyin istiqaməti: mənəvi dirçəliş” (Болашаққа бағдар: рухани жаңғыру»" adlı proqram xarakterli məqaləsi çərçivəsində səfirlik Qazaxıstanın dövlətçiliyinin formalaşmasının mühüm tarixi dövrlərinə, tarixi şəxsiyyətlərinə, həmçinin tanınmış elm, ədəbiyyat və mədəniyyət xadimlərinə həsr olunmuş kitabların Azərbaycan dilində nəşri layihəsinə başlayıb.
Bu layihə çərçivəsində səfirlikdə Azərbaycan dilində "Қoblandy Batyr" kitabı təqdim olunub. Kitabı filologiya elmləri doktoru, Bakı Slavyan Universitetinin professoru Nizami Mamedov- Tağısoy Qazaxıstan səfirliyi və Azərbaycan Milli Elmlər Akademiyasının Tarix İnstitutunun iştirakı ilə tərcümə edib.
Tədbirdə Qazaxıstanın Azərbaycandakı səfiri Beybit İsabaev, professor və dilçi- alimlər, Qazaxıstan səfirliyinin nümayəndələri və Azərbaycanda yaşayan qazaxlılar iştirak ediblər.
Təqdimat mərasimində çıxış edən səfir qeyd edib ki, Qazaxıstan Prezidenti Nursultan Nazarbayevin fundamental, proqram xarakterli “Gələcəyin istiqaməti: mənəvi dirçəliş” məqaləsi təkcə qazax xalqı üçün deyil, həm də bütün türk dünyası üçün tövsiyəedici xarakter daşıyır. B.İsabaev Qazaxıstanın dövlət başçısının öz tarixini xatırlamaq, onu qiymətləndirmək, nəsildən-nəslə ötürmək çağırışına da diqqət çəkib.
Tərcümənin müəllifi N. Məmmədov-Tağısoy göstərdiyi dəstəyə görə, səfirliyə təşəkkür edib. Onun sözlərinə görə, bu epos qazax xalqının həyatını, bütün xüsusiyyətlərini anlamağa inkan verir.
Təqdimat mərasimində qeyd edilib ki, bu artıq Azərbaycan dilində tərcümə olunmuş dördüncü nəşrdir. Daha əvvəl Qazaxıstan dövlətinin 550 illiyinə həsr olunmuş elmi məqalələr toplusu, "Kız Jibek" adlı Qazaxıstan xalq lirik-epik poeması, eləcə də türk dünyasının görkəmli xadimi, böyük qazax şairi, filosof və mütəfəkkir Abay Kunanbayev haqqında kitablar tərcümə edilib.
Səfir vurğulayıb ki, , layihə davamlı olacaq və növbəti illərdə Qazaxıstan klassiklərinin, görkəmli ictimai xadimlərinin və başqalarının əsərləri Azərbaycan dilinə tərcümə ediləcək.
P.Sultanova