Həyatın şansı. MFL-in ən yaxşı futbolçuları Topaz Premyer Liqası klublarının toplanışında – FOTO – VİDEO
Mehdi Əzimzadə (“Sabunçu”), Məmiş Nəzərov (“GB Solution”), Elvin Əlizadə (“İKAU”), Cəbrayıl İsmayılov (“Juventus Baku”).
Bu adlar futbolçulara və Azərbaycanın ən böyük həvəskar futbol liqası olan MFL-in azarkeşlərinə yaxşı tanışdır.
Yuxarıda adları çəkilən həvəskar futbolçuların hər biri layihənin inkişafına öz töhfəsini verib. MFL isə öz növbəsində iştirakçıları üçün imkanlar yaradır. Artıq qeyd etdiyimiz kimi, dekabrın 29-da, Dünya Azərbaycanlılarının Həmrəylik Günü və Yeni il ərəfəsində regionun əsas arenası olan Bakı Olimpiya Stadionunda Böyük Oyun keçirildi.
Mövzu ilə əlaqədar oxuyun:
MFL All STAR: həvəskar futbolçuların iştirakı ilə inanılmaz oyun – FOTO – VİDEO
MFL All Star – yaxşıların ən yaxşısını bir araya toplayan və bütün iştirakçılara bayram əhval-ruhiyyəsi yaradan oyundur. CBC Sport telekanalının tamaşaçıları isə canlı olaraq MFL-dən bəlkə də ən yaxşı hədiyyə qazanan həvəskarların oyununu izləmək imkanı əldə etdilər.
Lakin MFL sehri bununla bitmir. MFL və Topaz Premyer Liqasının iki komandası arasında aparılan danışıqların nəticəsi olaraq liqanın dörd ən yaxşı futbolçusu “Keşlə” və “Sumqayıt” komandaları ilə birgə Antalyaya təlim-məşq toplanışına yollandılar.
MFL-in seleksiyaçıları iki kluba ən yaxşı futbolçularını təklif etdilər və onların arasından dörd futbolçu seçildi. Beləliklə, Məmiş Nəzərov və Elvin Əlizadə “Sumqayıt”ın, Mehdi Əzimzadə ilə Cəbrayıl İsmayılov isə “Keşlə”nin heyətində Antalyada təlim-məşq toplanışında oldular.
Aydındır ki, bu, müxtəlif yaş qruplarından olan komandalarda oynamış həvəskar futbolçular üçün uşaqlıqdan arzu etdikləri bir şansdır. MFL bu oyunçulara özlərini göstərməyə, sübut etməyə kömək etdi. Onlar Azərbaycan Premyer Liqasının ən güclü futbolçuları ilə məşq etmək imkanı qazandılar.
Ceyhun Sultanov – “Sumqayıt”ın baş meneceri MFL-də ən tanınmış simalardandır. Liqada oynayan Azərbaycan yığmasının keçmiş futbolçusu hətta bir ara ən yaxşı “assistentlərin” sırasında da yer alıb. Ceyhun karyerasını başa vurandan sonra da dispetçerlik keyfiyyətlərini itirməyib.
“MFL-dən olan oyunçuların bizimlə məqşlərə cəlb edilməsi fikrinə müsbət yanaşıram. Gənclərin futbola, sağlam həyat tərzinə cəlb olunmasını dəstəkləyirik. Bu onları diqqətlərini idmanda cəmləmələrinə və lazımsız işlərlə məşğul olmamalarına imkan verir”- deyə, Ceyhun Sultanova 1news.az-a bildirib.
Ceyhun Sultanovun sözlərinə görə, böyük futbola yolunu futzal açıb, hansı ki, məhz burada onu kəşf ediblər:
“Mən özüm MFL-də oynayıram, bu əla fikirdir. İstəyirəm ki. bu çümpionat davamlı olaraq keçirilsin. Bu peşəkar klubların diqqətini cəlb etmək istəyən gənc futbolçular üçün də bir şansdır. Mən özüm də futzalda oynayan zaman böyük futbola gəlmişəm. Rəhmətlik Ruslan Abdullayev oyunumu gördü və böyük futbola cəlb elədi. Buna görə də istisna etmək olmaz ki, MFL-in hansısa gənc oyunçusu gələcəkdə peşəkar komandaların diqqətini cəlb edə bilər”.
Peşəkar komandanın heyətində toplanışda olmaq hər bir həvəskar futbolçu üçün həyəcanlı bir andır. 1news.az stadionun tribunalarından izləyə biləcəyi futbolçularla birgə məşq edən MFL-in qəhrəmanları ilə danışıb.
Ötən mövsüm MFL-in ən yaxşı bombardiri olan Elvin Əlizadə Sumqayıta anadan olub və böyüyüb. Bu şəhərin eyniadlı klubunun azarkeşidir. MFL sayəsində Elvin nəinki sevimli komandasına azarkeşlik etmək, həm də onunla birgə Antalyada keçirilən toplanışda məşq etmək imkanı əldə etdi.
Elvin Əlizadə (“İKAU”): “Artıq iki ildir ki, MFL-də oynayıram. Bu, həvəskarlar üçün ən yaxşı turnirdir. Burada oynamaqdan böyük zövq alıram. MFL bir çox şeyləri bizə öyrədən bir ailədir. MFL All Star bizim üçün növbəti imkan oldu. Özümü oyuna çox yaxşı hazırlamışdım, öz gücümə inanırdım və əmin idim ki, qol vuracam.
Sumqayıt futbol məktəbinin yetirməsiyəm. Lakin 16 yaşımdan sonra böyük futbolda oynamamışam. 22 yaşımdan futzal liqalarında çıxış edirəm. Toplanışa məhz “Sumqayıt” klubu ilə gəlməyimə görə çox şadam. Bu klub anadan olduğum və boya-başa çatdığım doğma şəhərimi təmsil edir. Buna görə də “Sumqayıt”ın toplanışında özümü yaxşı tərəfdən göstərmək istəyirdim”.
Mehdi Əzimzadə (“Sabunçu”): “MFL analoqu olmayan çempionatdır. Bu çox maraqlı çempionatdır və burada oynadığım üçün şadam. Əvvəl güclü həyəcan keçirirdik. İndi isə MFL-in bir hissəsiyik.
MFL All Star bizə bu cür möhtəşəm bir stadionda oyun ab-havasını hiss etməyə imkan verən əla bir fikirdir. Azərbaycanda hər bir peşəkar futbolçuya Olimpiya Stadionunda oynamaq qismət olmayıb. Bəli, biz həvəskarıq, bununla belə bütün bacarığımızı göstərməyə çalışdıq.
Peşəkar səviyyədə futbol oynamışam, toplanışda iştirak etmişəm. Bu ab-hava mənə yad deyil. Lakin həmin dövrdən artıq 10 il keçib. Çox çətin olacaq, lakin özümüzü yaxşı tərəfdən göstərməyə çalışacağıq və sübut edəcəyik ki, MFL-də ən yaxşıları oynayır!”.
Məmiş Nəzərov (“GB Solution”): “MFL-də onun yarandığı gündən oynamağa başlamışam. Bu bizim üçün böyük turnirdir. MFL həvəskarlar arasında çox böyük iş görür. MFL All Star oyunu bunu bir daha sübut edir. Unudulmaz emosiyalardır. Heç ağlıma belə gəlməzdi ki, nə vaxtsa Bakı Olimpiya Stadionunun meydanına çıxacam.
“Sumqayıt” klubunun toplanışında iştirak etdik. Bu özümüzü göstərmək üçün bir şans oldu. Başa düşürəm ki, peşəkarlarla böyük meydanda oynamaq çox çətindir. İstənilən halda bu əla imkandır”.
Cəbrayıl İsmayılov (“Juventus Baku”): “Artıq iki ildir ki, MFL-də oynayırıq, “MFL San-Marino” Kubokunun qalibi olmuşuq. MFL-də oynamaq çox xoşdur. Bu yaxınlarda Bakı Olimpiya Stadionunda MFL All Star oyunu keçirildi. Regionun ən böyük stadionunda oynamaq təsəvvür edilə bilməz bir duyğudur.
Əvvəllər peşəkar futbol oynamışam. Böyük meydan mənə yad deyil. Hazırda həvəskarlarla çıxış edirəm. Əlbəttə ki, “Keşlə”nin oyunçuları ilə ayaqlaşmaq çətindir. Fiziki cəhətdən lazımi səviyyədə hazırlıqlı deyiləm, mənim bu cür təcrübəm yoxdur. Lakin ola bilsin özümü göstərə bildim”.
Şübhə yoxdur ki, MFL bundan sonra da bütün futbol həvəskarlarını yeni maraqlı layihələrlə sevindirməkdə davam edəcək. İndi isə bütün futbol azarkeşləri adından bu həvəskar liqanın rəhbərliyinə və dörd həvəskar futbolçuya gözəl hədiyyə bəxş edən “Sumqayıt” və “Keşlə” klublarına təşəkkür edirik. Ümid edirik ki, bunun davamı da olacaq!
Teymur Maksutov
