Qubadakı oteldə kanat xətti qırıldı: ölən və yaralanan var – FOTO – YENİLƏNİB

“Quba Palace Hotel”in marketinq şöbəsinin müdiri Ceyhun Yəhyayevin verdiyi məlumata görə, hadisə “Скадо строй монтаж” şirkətinin əməkdaşlarının ehtiyatsızlığı səbəbindən baş verib:

“Bu ilin iyun ayının 23-dən etibarən Rusiyanın “Скадо строй монтаж” şirkəti tərəfindən “Quba Palace Hotel” otelinin kanat yolunda planlı təmir işləri həyata keçirilir. Təmir işləri başlandığı tarixdən etibarən kanat yolunun fəaliyyəti tam dayandırılıb. “Скадо строй монтаж” şirkəti tərəfindən aparılan təmir zamanı bədbəxt hadisə baş verib. Hadisə zamanı təmiri həyata keçirən işçilərdən biri həlak olmuş, iki nəfər yüngül xəsarət alıb”.

Həmçinin C.Yəhyayev bildiririb ki, xəbər saytlarında ilkin verilən məlumatlar həqiqəti əks etdirmir.

“Təmir işləri otelin istirahət zonasından tamamilə kənarda aparıldığından, baş verən hadisə qonaqların istirahətinə hər hansı bir şəkildə narahatlıq yaratmayıb. Qonaqların istirahəti təhlükəsiz şəkildə davam edir”.

15.45

Qubada yerləşən “Quba Palace Hotel”ə (əvvəlki adı Quba Rixos) məxsus olan kanat qırılıb.

1news.az-ın verdiyi xəbərə görə, hadisə zamanı ölən və yaralananlar olub.

Hadisə zamanı kanatı təmir edən Qubanın Amsar kənd sakini 1992-ci il təvəllüdlü İsayev Rüzgar Mürvət oğlu ölüb.

Bundan başqa, digər təmir işçiləri Quba sakinləri 1958-ci il təvəllüdlü Həsənov Rafiq Əziz oğlu və 1985-ci il təvəllüdlü Əliməmmədov Ruhid Mehman oğlu xəsarət alaraq Quba Mərkəzi Rayon Xəstəxanasına yerləşdirilib.

Hadisə ilə bağlı cinayət işi açılıb.

S.Xankişiyeva