Səfir: Azərbaycan - Avstriya əlaqələrinin inkişafında yeni istiqamətlər ola bilər
Bakıda Avstriyanın Milli Günü münasibətilə rəsmi qəbul təşkil edilib.
1news.az xəbər verir ki, qəbulda dövlət rəsmiləri, Milli Məclisin deputatları, diplomatlar, ictimaiyyətin nümayəndələri iştirak ediblər.
Avstriyanın Azərbaycandakı səfiri Axel Vex ölkəsinin ötən müddət ərzində keçdiyi inkişaf yolundan danışıb.
Azərbaycanla münasibətlərin səviyyəsinə toxunan diplomat deyib: “Biz iki ölkə arasında mədəni, siyasi və iqtisadi sahələrdə əlaqələrin inkişafına şahid olduq. Hətta 2016-2017-ci illərdə iqtisadi çətinlik müşahidə ediləndə, əksər Avstriya şirkətləri ölkədə qaldı və fəaliyyətlərini davam etdirdi. Bu onu göstərir ki, Azərbaycanda fəaliyyətimiz davamlıdır və uzunmüddətli plana əsaslanır. Siyasi baxımdan isə 2017-ci ildə Avstriyanın ATƏT-ə sədrliyi mühüm əhəmiyyətə malik idi".
A.Vex əlavə edib ki, Azərbaycanla Avstriya əlaqələrinin inkişafında yeni istiqamətlər ola bilər. Ölkəmizdə diplomatik missiyasını başa çatdırmaqda olan Vex qeyd edib ki, yeni səfir bu istiqamətdə əlaqələri daha da inkişaf etdirmək üçün işləyəcək.
Milli Məclis sədrinin müavini Bahar Muradova münasibətilə dövlət başçısı İlham Əliyevin adından Avstriya xalqını təbrik edib, sülh və əmin-amanlıq arzularını çatdırıb. O deyib ki, Avstriya Azərbaycanın müstəqilliyini tanıyan ilk ölkələrdəndir. Siyasi, iqtisadi, humanitar və digər sahələrdə ikitərəfli əlaqələr uğurla inkişaf edir. Azərbaycanda 60-dan çox Avstriya şirkəti fəaliyyət göstərir və bu da iqtisadi əməkdaşlığın genişlənməsindən xəbər verir. Əlaqələrimizin dərinləşməsində yüksək səviyyəli qarşılıqlı səfərlər önəmli rol oynayır. Münasibətlərimizin yaxşı perspektivləri var.
Bahar Muradova ölkələrimizin parlamentləri arasında əlaqələrin inkişafından da danışıb.
P.Sultanova