İlham Əliyev: Gürcüstan və Azərbaycan bundan sonra da bir-birini dəstəkləyəcək

Azərbaycanda yaşayan gürcülər və Gürcüstanda yaşayan azərbaycanlılar əlaqələrimizin inkişafı üçün çox önəmli rol oynayırlar.

1news.az xəbər verir ki, bunu Prezident İlham Əliyev Azərbaycanda səfərdə olan Gürcüstan Prezidenti xanım Salome Zurabişvili ilə birgə mətbuata bəyanatlarla çıxışında deyib:

“Gürcüstan və Azərbaycan çoxmillətli, çoxkonfessiyalı ölkələrdir. Bu, bizim böyük sərvətimizdir. Ölkələrimizdə yaşayan bütün xalqların nümayəndələri özlərini çox rahat hiss edirlər. Bu, ölkələrimizin bugünkü və gələcək inkişafı üçün çox önəmli amildir”.

Dövlət başçısı iki ölkə arasında bütün sahələr üzrə əməkdaşlığın çox böyük perspektivlərinin, ən əsası isə güclü siyasi iradəsinin olduğunu vurğulayıb:

“Gürcüstan və Azərbaycan bundan sonra da bir-birini dəstəkləyəcək. Biz reallaşan layihələri bundan sonra da inkişaf etdirəcəyik və yeni layihələr haqqında düşünəcəyik. Əminəm ki, xalqlarımızın, dövlətlərimizin çox gözəl gələcəyi var. Bugünkü rəsmi səfər bizim əlaqələrimiz üçün çox böyük əhəmiyyət daşıyır”.

1news.az