Bakıda Özbəkistanın müsəqillik günü qeyd edilib - FOTO
Bakıda Özbəkistanın Milli bayramı - Dövlət müstəqilliyinin 28-ci ildönümü münasibətilə rəsmi qəbul keçirilib.
1news.az xəbər verir ki, qəbulda hökumət rəsmiləri, millət vəkilləri, xarici ölkələrin Azərbaycandakı səfirləri, ictimaiyyət nümayəndələri iştirak ediblər.
Hər iki ölkənin dövlət himnləri səsləndirildikdən sonra çıxış edən səfir Şerzod Fayziyev ölkəsinin müstəqillik tarixindən söz açıb. Bildirib ki, müstəqilliyinin qısa tarixi dövründə Özbəkistan dünyada özünə layiqli yer tutub. Hazırda Özbəkistan inkişafının yeni mərhələsinə qədəm qoyub. Sahibkarlıq və özəl mülkiyyət üçün geniş şərait yaradır. Buna görə də ölkəyə vəsait qoyan xarici investorların sayı artır.
Diplomat vurğulayıb ki, Özbəkistanın qardaş Azərbaycan ilə sıx əlaqələri var. Bu əlaqələr iqtisadiyyatın bir çox sahələrini əhatə edir. Ticarət, nəqliyyat və digər sahələri xüsusi qeyd etmək lazımdır.
Rəsmi qəbulda çıxış edən Baş nazir Novruz Məmmədov Özbəkistanın Dövlət müstəqilliyinin 28-ci ildönümü münasibətilə Azərbaycan Prezidenti və hökuməti adından qardaş özbək xalqını təbrik edib, əmin-amanlıq və rifah arzulayıb.
Baş nazir deyib ki, ölkələrimizi ortaq soykökü, möhkəm tarixi dostluq və qardaşlıq əlaqələri bağlayır. Bu əlaqələr əməkdaşlığımızın daha da genişlənməsinə və inkişaf etdirilməsinə güclü zəmin yaradır. Müstəqilliyimiz bərpa edildikdən sonra münasibətlərimiz daha da dərinləşərək strateji tərəfdaşlıq səviyyəsinə yüksəlib. Qardaş Özbəkistanın ictimai-siyasi həyatında baş verən mühüm dəyişikliklər, iqtisadi sahədə əldə edilən uğurlar, ölkənin beynəlxalq nüfuzunun gündən-günə artması bizi sevindirir.
Əlaqələrimizin möhkəmlənməsində dövlətlərimizin başçılarının münasibətlərinin xüsusi rolu olduğunu vurğulayan N.Məmmədov əminliyini bildirib ki, Azərbaycan Prezidenti İlham Əliyev və Özbəkistan Prezidenti Şavkat Mirziyoyev arasında yaranmış dostluq münasibətləri bundan sonra da ikitərəfli əlaqələrimizin bütün sahələrdə daha da genişlənməsinə öz töhfəsini verəcək.
Baş nazir deyib ki, ölkələrimiz həm ikitərəfli müstəvidə, həm də beynəlxalq təşkilatlarda bir sıra istiqamətlər üzrə fəal qarşılıqlı dəstək nümayiş etdirirlər:
“Xüsusilə vurğulamaq istərdim ki, biz Özbəkistanın Ermənistan-Azərbaycan Dağlıq Qarabağ münaqişəsinin həllində Azərbaycanın beynəlxalq hüquq normalarına, dövlətlərin suverenliyi, ərazi bütövlüyü, sərhədlərin toxunulmazlığı prinsiplərinə əsaslanan haqlı mövqeyinə nümayiş etdirdiyi ədalətli dəstəyi yüksək qiymətləndiririk”.
Ölkələrimizin iqtisadi əlaqələrinin inkişafında Azərbaycanla Özbəkistan arasında birgə Hökumətlərarası Komissiyanın da mühüm rolu olduğunu deyən N. Məmmədov diqqətə çatdırıb ki, Azərbaycanı əlverişli regional tranzit mərkəzinə çevirən irimiqyaslı infrastruktur layihələrindən, o cümlədən Bakı-Tbilisi-Qars dəmir yolundan Özbəkistanın da gələcəkdə faydalanması ölkələrimiz arasında iqtisadi əməkdaşlığın gücləndirilməsinə təkan verəcək.
“Azərbaycan və Özbəkistan xalqlarının tarixi və mədəni bağlılıqları əsrlərə söykənir. Azərbaycanın dahi şairi Nizami Gəncəvidən ilhamlanaraq daha bir “Xəmsə” yaradan Əlişir Nəvainin irsi bizim xalqın da dəyər verdiyi mənəviyyat və əxlaq xəzinəsidir. Onun yaradıcılığı Azərbaycan ədəbiyyatı ilə yaxından bağlıdır. Bakının mərkəzində abidəsi olan bu böyük mütəfəkkirin xatirəsinə ehtiram əsrlər boyu bir-biri ilə sülh, həmrəylik şəraitində yaşamış özbək və Azərbaycan xalqları arasında münasibətlərin ruhunu əks etdirir.
Bütün sadalananlar bir daha onu deməyə əsas verir ki, ölkələrimiz arasındakı ənənəvi qardaşlıq və dostluq münasibətləri sağlam təməllər üzərində daim inkişaf etdiriləcək”, - deyə baş nazir qeyd edib.
P.Sultanova
