Fərid Şəfiyev Almaniya səfirinə cavab verib: Fikirləri qəbuledilməzdir
Almaniyanın Azərbaycandakı səfirinin Ermənistandan Azərbaycana axan Oxçuçayın çirklənməsində Almaniyanın "CRONIMET Holding GmbH" şirkətinin iştirakına dair media sorğusuna cavabı qəbuledilməzdir. Bu şirkət illərlə bölgədə yatağa sahib olaraq istismar edib, ətraf mühitin çirklənməsinə görə məsuliyyət daşıyıb və hazırda da daşıyır.
1news.az-ın verdiyi xəbərə görə, bunu Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev deyib.
O bildirib ki, Almaniya qanunlarına əsasən bənzər hallarla əlaqədar şirkətlər sərt şəkildə məsuliyyətə cəlb ediləcəklər: "Beynəlxalq media illərdir, bu məsələni qaldırır. Erməni rəsmiləri də Nikol Paşinyanın hakimiyyətə gəlməsindən sonra ətraf mühitin çirklənməsinə görə narahatlıqlarını ifadə edib. Məsələdə adı çəkilən Ermənistanın Zəngəzur Mis-Molibden Kombinatı (burada Zəngəzur adı da diqqəti çəkir) Ermənistanın keçmiş prezidenti Serj Sarkisyana bağlılığı ilə tanınıb. Bu kimi əməliyyatlar tək Azərbaycanda deyil, Ermənistanda da ciddi fəsadlara səbəb olur. Bir sözlə, ətraf mühit problemlərinə laqeyd yanaşma regiona mənfi təsir edir.
Beynəlxalq Münasibətlərin Təhlili Mərkəzi bir neçə ay öncə keçmiş işğal olunmuş ərazilərdə mövcud olmuş eyni problemlə bağlı ətraflı tədqiqat hazırlayıb. Nəticə etibarı ilə bütün bunlar Ermənistanın özünə də təsirsiz ötüşməyəcək. Problemi beynəlxalq səviyyədə əməkdaşlıq etməklə tamamilə həll etmək mümkündür. Almaniya məsuliyyətdən boyun qaçırmaq əvəzinə, problemin qəti həlli üçün addım atmalıdır".
