“Dövlət bu bəlanın verdiyi fəsadlara görə əlavə yüklənmək arzusunda deyil” - Deputatdan ÇAĞIRIŞ

“Biz özümüzü qorumaqla ətrafımızı, ailəmizi, ümumi məhfum olaraq dövlətimizi qorumuş oluruq. Bir il əvvəl ağır qadağaların mövcud olduğu uzunmüddətli və gərgin günlər yaşadıq”.

Bu sözləri 1news.az-a açıqlamasında Milli Məclisin deputatı Vüqar İsgəndərov bildirib.

O, qeyd edib ki, qadağaların bərpa olunmasını həm dövlət, həm də vətəndaşlar arzulamır.

“Çünki cəmiyyət vərdiş aldığı normal həyatını yaşamaq istəyir. Dövlət isə bu bəlanın verdiyi fəsadlara görə əlavə yüklənmək arzusunda deyil. Deməli, məntiqlə baxsaq, Azərbaycan dövləti, höküməti və cəmiyyət arzu edir ki, pandemiya tez bitsin. Normal həyat yenidən qayıtsın”.

Deputat əlavə edib ki, son vaxtlar vaksinasiyanın sürətlə aparılmasına baxmayaraq, yoluxanların və ölənlərin sayında artım müşahidə edilir.

“Bu, bizi düşündürməlidir. Nə baş verir? Statistika göstərir ki, yoluxanların böyük əksəriyyıəti vaksinasiyadan kənarda qalanlardır. Həmçinin ölənlərin də demək olar ki, hamı vaksin olunmayanlardır. Deməli, hazırda əsas vəzifəmiz vasksinasiya ilə bağlı düzgün təbliğat aparmaqdır”.

Millət vəkilinin fikrincə yenidən normal həyata qayıtmaq istəyiriksə, o zaman hər bir vətəndaş kütləvi vaksinləşmə prosesinə cəlb olunmalıdır.

“Mütəxəssislərimiz deyir ki, insanların 70 faizi vaksin olunarsa, biz bu bəlaya qalib gəlmək barədə düşünə bilərik. İndiki məqamda hələ ki, dünya tibbi vaksindən başqa digər alternativ yolun mövcud olmadığını bildirir. Ona gorə də ilk vəzifəmiz ehtiyyatlı olmaq, tətbiq edilən qaydalara ciddi riayət etmək vaksin olunmaq üçün aktivliyimizi artırmalıyıq.Ölkəmizin xoşbəxt gələcəyi,sağlam həyat tərzi bizim əlimizdədir.Elə buna görə də bu fürsəti əldən verməyək. Ən əsası da üzərimizə düşən vəzifəni layiqincə yerinə yetirək”.

Aytən Sakitqızı