Avropa çempionumuz qələbəsini şəhidlərimizə həsr edib

“İlk döyüşümdə irlandiyalı Antonio Payva ilə üz-üzə gəldim. O, bir az hissiyyatlı idi. Amma layiqli döyüşüb, rəqibdən güclü olduğumu nümayiş etdirdim”.

1news.az-ın verdiyi xəbərə görə, bunu Azərbaycan Boks Federasiyasının mətbuat xidmətinə Xorvatiyanın Poreç şəhərində 22 yaşadək boksçular arasında Avropa çempionu titulunu qazanan Nicat Hüseynov deyib.

51 kq çəki dərəcəsində inamlı çıxış sayəsində fəxri kürsünün ən yüksək pilləsinə qalxan idmançı daha böyük uğurlarının qarşıda olduğunu açıqlayıb. 18 yaşında 19-22 yaşlı boksçular arasında Avropanın ən güclüsü adını qazanan milli üzvü yarışda ən çətin döyüşünün yarımfinala təsadüf etdiyini bildirib: “Yarımfinalda türkiyəli Mehmethan Çinarla görüşüm gərgin və ağır keçdi. Rinqə də bədən ağrısı ilə çıxmışdım. Öz üslubumda döyüşərək finala yüksəldim”.

Nicat Hüseynov finalda gürcüstanlı Lekso Xasaya üzərində qələbəsinin sirrini də açıqlayıb: “Finala çox yaxşı köklənmişdim, döyüşə həvəslə çıxdım. Görüş gərgin alınsa da, tezliklə üstünlüyü ələ aldım. Raundları xeyrimə bitirdim. Məqsədim qızıl medal qazanmaq idi və onu da götürüb, gəlirəm”.

O, qələbəsini 44 günlük Vətən Müharibəsinin şəhidlərinə həsr etdiyini vurğulayıb: “Yarışa yollanmazdan öncə də hədəfimin çempionluq olduğunu demişdim. Şükürlər olsun, bunu bacardım. Qələbəmi şəhidlərimizə həsr edirəm. Biz həmişə onlara borcluyuq. Ən böyük zəfəri onlar qazanıblar”.

Daha əvvəl dünya və Avropa birinciliklərinin bürünc medalını qazanan çempion gələcək hədəflərini də açıqlayıb. Vüqar Ağalarovun yetirməsi olan Hüseynov bildirib ki, əsas arzusu Azərbaycan boks tarixinə Olimpiya çempionu kimi düşməkdir: “Qatılacağım bütün yarışlarda Azərbaycan himnini səsləndirmək istəyirəm. Ən böyük arzum isə Paris Yay Olimpiya Oyunlarında çempion olub, ölkə boksunda tarix yazmaqdır”.

Qeyd edək ki, U-22-lərin Avropa çempionatına 7 boksçu ilə yollanan milli komanda yarışı 1 qızıl, 1 gümüş və 2 bürünc medalla başa vurub.