Yaponiya yeddinci dalğa ilə mübarizə aparır!
Covid-19 pandemiyasında 7-ci dalğanı yaşayan Yaponiyada gündəlik yoluxma sayı 152 min 535-ə çatıb.
1news.az Hürriyet.com-a istinadən xəbər verir ki, Yaponiyada günlük yoluxma sayında rekord qırıldı.
Yaponiya Səhiyyə Nazirliyinin və yerli hökumətlərin məlumatlarına görə, son 24 saat ərzində ölkə üzrə 152 535 yeni yoluxma təsdiqlənib.
Epidemiyanın başlanğıcından bəri görülən ən yüksək yoluxma sayı ölkə daxilində ümumi balansı 10 milyon 630 min 647-yə çatdırarkən, 53 vətandaşın ölümü ümumi ölüm sayını 31 min 715-ə yüksəltdi.
Yaponiyada gündəlik yoluxma hallarının sayı iyulun 15-də 103 311-ə çataraq fevral ayından bəri ilk dəfə 100 000 yoluxma həddini keçib. Yaponiyanın Baş naziri Fumio Kişida, hökumətin səhiyyə sistemini gücləndirməyə davam edəcəyini və yüksək hazırlıq vəziyyətində qalaraq, sosial-iqtisadi fəaliyyətləri normal vəziyyətə gətirmək üçün səyləri dəstəkləyəcəyini söylədi.
İnsanların sosial həyatını məhdudlaşdırmaq niyyətində olmadıqlarını vurğulayan Kişida, 60 yaşdan yuxarı insanlara və 18 yaşdan yuxarı xroniki sağlamlıq problemi olan xəstələrə vurulan 4-cü doza peyvəndin qocalara qulluq edən müəssisələrdə işləyən insanlar və səhiyyə işçiləri üçün də əlçatan olacağını bildirdi.
Digər tərəfdən, yay tətili mövsümündə səyahət etməzdən əvvəl insanların qatar stansiyalarında və hava limanlarında pulsuz sınaqdan keçməsinə imkan verəcək 100-dən çox test mərkəzi yaratmağı xahiş edəcəyi açıqlanıb.
Humay Əliyeva
