Kamaləddin Qafarov: “Prezident İlham Əliyevin açıqlamaları bütün dünyada böyük maraq doğurdu”
“Fevralın 18-də Almaniyada Münxen Təhlükəsizlik Konfransı çərçivəsində “Dağları aşmaq? Cənubi Qafqazda təhlükəsizliyin qurulması” mövzusunda keçirilmiş plenar iclas Avropa ictimaiyyətinə regionumuzda formalaşmış yeni reallıqlar və tarixi həqiqətlər barədə obyektiv məlumatların çatdırılması baxımından böyük əhəmiyyət kəsb etdi. Bu mövzuda öz fikirlərini bildirən Azərbaycan Prezidenti İlham Əliyev Azərbaycan xalqının müharibənin nə olduğunu, onun insanlara hansı dəhşətləri yaşatdığını öz acı təcrübəsindən yaxşı bildiyini vurğulayaraq, Avrasiyada sülhün bərqərar olunmasını birmənalı dəstəklədiyimizi qeyd etdi. Plenar iclasın bir özəlliyi də Azərbaycan, Gürcüstan və Ermənistan rəhbərlərinin ilk dəfə bir araya gələrək görüşmələrində idi”.
Bunu mətbuata açıqlamasında Milli Məclisin deputatı Kamaləddin Qafarov deyib.
Deputat Münxen Təhlükəsizlik Konfransının Azərbaycan-Ermənistan münasibətlərinin normallaşdırılması və iki ölkə arasında sülh sazişinin imzalanması istiqamətində işlərin daha da intensivləşdirilməsi üçün önəmli platforma ola biləcəyini qeyd etdi: “ Prezident İlham Əliyevin qeyd etdiyi kimi, Ermənistan ilə Azərbaycan arasında sülh sazişinin imzalanması ciddi tarixi fikir ayrılığına malik olan bir çox digər ölkələrin də bir araya gəlməsi və düşmənçilik səhifəsinin bağlanması üçün yaxşı nümunə ola bilər. Lakin Ermənistanın baş naziri Nikol Paşinyanın Azərbaycanda inzibati ərazi vahidi kimi mövcud olmayan “Dağlıq Qarabağ” ifadəsini davamlı olaraq işlətməsi, Qarabağda yaşayan ermənilərin blokadaya alınmaları və hansısa humanitar böhranla üz-üzə gəlmələri barədə cəfəng iddiaları bu ölkənin hələ də sülh və mehriban qonşuluq şəraitində yaşamağa hazır olmadığını göstərdi. Beynəlxalq ictimaiyyətin diqqətini Laçın dəhlizi ətrafında cərəyan edən hadisələrə cəlb etməyin vacibliyindən ağız dolusu danışan Paşinyanın, nədənsə, ermənilərin 28 illik işğal dövründə Azərbaycan ərazilərində törətdikləri vəhşiliklərdən, xalqımıza tutulan divanlardan, bu gün Azərbaycana mina xəritələrinin təqdim edilməməsindən bir kəlmə də danışmadı”.
K.Qafarov Prezident İlham Əliyevin verilən bütün suallar və müzakirə edilən məsələlər barədə aydın və sərrast açıqlamalarının Azərbaycanın prinsipial mövqeyini bir daha nümayiş etdirdiyini vurğulayaraq deyib: “İlk növbədə, Prezidentimiz Azərbaycanda Dağlıq Qarabağ kimi inzibati ərazi vahidnin olmadığını və Azərbaycanın suverenliyinə və Konstitusiyasına hörmətlə yanaşmanın zəruriliyini bir daha hər kəsin diqqətinə çatdırmaqla öz haqlı və prinsipial mövqeyini növbəti dəfə ortaya qoymuş oldu. Dövlətimizin başçısı regionda vəziyyətə iki istiqamətli yanaşmanın zəruri olduğunu qeyd etdi. Bunlardan biri Azərbaycanla Ermənistan arasında sülh danışıqları, digəri isə Azərbaycanın Qarabağdakı erməni əhalisi ilə əlaqələri istiqamətidir. Beləliklə, Qarabağda yaşayan ermənilərlə bağlı istənilən məsələnin Azərbaycanın sırf daxili işi olduğu bir daha vurğulanmış oldu. Cənab Prezident konkret faktlar və rəqəmlərlə Qarabağda yaşayan ermənilərin blokadada olmaları barədə cəfəng iddiaların, ümumiyyətlə, heç bir əsası olmadığını növbəti dəfə sübut etdi. Dövlətimizin başçısı Azərbaycanla Ermənistan arasında münasibətlərin normallaşdırılması üçün mövcud platformalara dair verdiyi açıqlamalar da xüsusi maraq doğurmaya bilməzdi. ABŞ dövlət katibi Blinken tərəfindən təşkil olunmuş üçtərəfli görüş zamanı Brüssel prosesinin və üçtərəfli formatın müzakirə edildiyini bildirən Prezident İlham Əliyev bu formatın üçtərəfli yəni, Aİ, Azərbaycan və Ermənistan arasında olduğu barədə ümumi bir anlaşma olduğunu diqqət mərkəzinə çəkdi. Dövlətimizin başçısı Fransanın birtərəfli ermənipərəst mövqe tutduğundan bu ölkənin yeni yaradılmış platformada artıq iştirak etmədiyini bəyan etməsi Azərbaycanın prinsipial mövqeyini bir daha ortaya qoydu”.
Kamaləddin Qafarov İran-Azərbaycan münasibətlərinin normallaşdırılması ilə bağlı Prezident İlham Əliyevin verdiyi açıqlamanın möhkəm məntiqə və ədalət prinsiplərinə əsaslandığından da söz açıb: “İran hökumətinin ölkəmizə və xalqımıza qarşı əsl münasibəti özünü torpaqlarımızın 20 faizinin erməni işğalı altında olduğu 30 il ərzində bütün çılpaqlığı ilə göstərib. İşğal dövründə Azərbaycanın sərvətlərinin ermənilər tərəfindən talan edilməsində bilavasitə iştirakı, işğal altında olan Qarabağda at oynadan separatçılara silah-sursat daşınmasını həyata keçirməsi, minlərlə günahsız insanımızın vəhşicəsinə qətlə yetirilməsinə göz yumması İranın Azərbaycana əsl münasibətini xarakterizə edə biləcək real göstəricilərdir. Yanvarın 27-də səhər saatlarında Tehranda yerləşən Azərbaycan Respublikasının İrandakı səfirliyinə olunan silahlı hücum ölkəmizə qarşı həyata keçirilmiş növbəti qanlı terror aktı idi. Hadisə nəticəsində səfirliyin təhlükəsizliyini təmin edən bir əməkdaş şəhid olmuşdur. Prezident İlham Əliyevin dediyi kimi, bu terror hadisəsindən sonra terrorçunun İran mediasına müsahibə verməsi faktı onun İran siyasi elitasının bəzi nümayəndələri tərəfindən göndərildiyini deməyə tam əsas verir. Buna görə İran hökuməti şəffaf istintaq aparmalıdır, Azərbaycan tərəfinə bu barədə dürüst məlumatlar verilməlidir, terrorçu və onu göndərənlər ədalət mühakiməsi qarşısına çıxarılmalıdır. Yalnız bundan sonra Azərbaycan İranla münasibətlərinin normallaşması məsələsini müzakirə edə bilər”.
