“Bu il də “Caspian Agro” və “InterFood Azerbaijan” sərgilərində rekord sayda milli və regional stendlər olacaq
Mayın 17-19-da Bakı Ekspo Mərkəzində keçiriləcək sayca 16-cı Azərbaycan Beynəlxalq Kənd Təsərrüfatı Sərgisi ("Caspian Agro") və 28-ci Azərbaycan Beynəlxalq Qida Sənayesi Sərgisində ("InterFood Azerbaijan") iştirakçıların 71 %-i xaricilər olacaq.
1news.az xəbər verir ki, bunu sərgilərlə bağlı bu gün keçirilən mətbuat konfransında Kənd Təsərrüfatı Nazirliyinin sektor müdiri Toğrul Qafarbəyli bildirib.
“Ötən il olduğu kimi bu il də sərgilərdə rekord sayda milli və regional stendlər nümayiş etdiriləcək. "Caspian Agro" kənd təsərrüfatı sənayesinin aparıcı iştirakçılarını, yerli və xarici ekspertləri, o cümlədən idxalçılar, ixracatçılar, distributorlar, topdan və pərakəndə ticarət nümayəndələri, həmçinin fermerlər də daxil olmaqla minlərlə peşəkar ziyarətçi auditoriyasını bir yerə toplayacaq. Sərgidə iştirakçılar arasında Azərbaycanla yanaşı ABŞ, Böyük Britaniya, Almaniya, İtaliya, Niderland, Çexiya, Polşa, Avstriya, İspaniya, Latviya, Estoniya, Gürcüstan, Qazaxıstan, Rusiya, Türkiyə, İsrail və Hindistan şirkətləri yer alacaq.
"InterFood Azerbaijan" isə keyfiyyətli malları bazara çıxarmaq, sərgi iştirakçıları ilə ziyarətçilər arasında birbaşa əlaqə yaratmaq məqsədi daşıyır. Sərgidə iştirakçılar arasında Azərbaycanla yanaşı, Almaniya, Fransa, İtaliya, Polşa, Slovakiya, Sloveniya, Belarus, Rusiya, İran, Türkiyə, Çin, Şri-Lanka, Tayland və ilk dəfə Tunisdən olan şirkətlər yer alacaq", - deyə nazirlik rəsmisi qeyd edib.
T. Qafarbəyli qeyd edib ki, iştirakçı və ziyarətçilərin maraqları nəzərə alınaraq, sərgilərin proqramı maraqlı tədbirləri və vacib mövzuları əhatə edəcək:
"Sərgilər çərçivəsində, dekorativ yeməklərin kompozisiyasından ibarət "Qida – sənət əsəri" sərgisi, Ümummilli Lider Heydər Əliyevin 100 illik yubileyinə həsr olunmuş "Qızıl Şah - Qızıl Yüzlük" III Milli Kulinariya Çempionatı keçiriləcək. Hər il təşkilatçılar regionlardan gələn fermerlər üçün sərgi üzrə turlar təşkil edirlər və bu tədbir çərçivəsində fermerlər ən son sənaye yenilikləri ilə tanış ola bilirlər, bu isə yüksək keyfiyyətli məhsul istehsalı üçün əvəzsiz şərtdir. Bu il baş tutacaq tura isə Naxçıvan Muxtar Respublikasından fermerlərin dəvət edilməsi nəzərdə tutulub".
