Azərbaycan Kibertəhlükəsizlik Mərkəzinin tələbəsi dünyanın ən qabaqcıl təqaüd proqramlarından birini qazanıb
Azərbaycan Kibertəhlükəsizlik Mərkəzinin tələbəsi dünyanın ən qabaqcıl təqaüd proqramlarından birini qazanıb.
1news.az xəbər verir ki, Azərbaycan Kibertəhlükəsizlik Mərkəzinin tələbəsi Zaur Allahverdiyev 2024-cü il üzrə Amerika Birləşmiş Ştatlarının “Hubert Hamfri” Tələbə Təqaüd Proqramını qazanıb.
Dünyanın ən prestijli təqaüd proqramlarından sayılan “Hubert Hamfri”nin məzunları arasında nobel mükafatçıları, ölkə başçıları yer alıb. Qeyd edək ki, təqaüdün məbləği 75 min ABŞ dolları təşkil edir.
Zaur Allahverdiyev 2013-cü il Dünya Startap müsabiqəsinin mükafatçısı, 2014-cü ildə Respublika kompüter bilikləri olimpiadasının qalibi və 2022-ci ildə isə Malayziya hökumətinin MTCP təqaüd müsabiqənin qalibi olub. 2023- cü ildə Yaponiyanın JICA proqramının məzunudur.
Hazırda Prezident yanında Vətəndaşlara Xidmət və Sosial İnnovasiyalar üzrə Dövlət Agentliyində İnformasiya texnologiyaları şöbəsində çalışır.
O, qazandığı təqaüdlə bağlı təəssüratlarını bölüşüb:
“Hazırda İnformasiya texnologiyaları sahəsində dövlət sektorunda çalışan peşəkar biri olaraq, Maksvel Vətəndaşlıq və İctimaiyyətlə Əlaqələr Məktəbində təhsil alacağım bir il ərzində xidmətlərin və informasiya sistemlərinin yaradılması və istifadəsi zamanı daha əlçatan, innovativ və təhlükəsiz qaydalar ilə təşkili istiqamətində xüsusi yanaşmaların tətbiqini öyrənəcəyəm.
Bu istiqamətdə dünya təcrübəsində mövcud olan siyasət sənədlərinin hazırlanma prosesini, idarəçilik və liderlik sahələrində bacarıqlarımı genişləndirməyi arzu edirəm”.
