Kirayə mənzil bazarında vəziyyət - Ekspertdən ÇAĞIRIŞ

Artıq avqust ayının ortalarındayıq və yeni tədris ilinin başlamasına bir ay qalıb.

Bu da o deməkdir ki, paytaxta tələbə axının başlamasına qısa bir zaman qalıb. Bəs hazırda kirayə mənzil bazarında qiymətlər necədir?

Kirayə mənzil bazarında hökm sürən vəziyyətlə bağlı 1news.az-ın sullarını cavablandıran Əmlak məsələləri üzrə ekspert Ramil Osmanlı hələ ki, ciddi bir dəyişiklik olmadığını qeyd edib:

“Bu adətən kodlaşdırma yekunlaşdıqdan sonra bəlli olur. Yəni abituriyentlərin haraya qəbul olduğu dəqiqləşdirqdən sonra müraciətlərin sayı kəskin artmağa başlayır. Hesab edirəm ki, təlabatın artması avqust ayının sonlarına doğru kəskin şəkildə müşahidə olunacaq və qiymətlər 15-20% artacaq”.

Ekspert tələbə yataqxanaları ilə bağlı vəziyyətin heç də ürəkaçan olmadığını və islahatlara ehtiyac olduğunu söyləyib:

“Proseslər belə göstərir ki, dövlət bu istiqamətdə ciddi əhəmiyyətli addım atmaq niyyətində deyil. Bu bir sahibkarlıq formasında, Türkiyə və digər təcrübələrdən istifadə etməklə həyata keçirilə bilər. Amma hər bir halda müəyyən stimulverici addımlar olmalıdır və sahibkarları bu prosesə cəlb etmək lazımdır”.

R.Osmanlı son olaraq kirayə mənzil axtarışında olanları tələsməyə səsləyib:

“Tövsiyəm budur ki, kirayə mənzil axtaranlar tələssinlər. Paytaxtda ucuz mənzillərin təklif portfelindəki payı çox sürətlə məhdudlaşır. Çünki bir tərəfdən bir və ikimərtəbəli fərdi yaşayış massivlərinin söküntüsü, digər tərəfdən də köhnə binaların sayının sürətlə azalması ucuz mənzillərin təklif portfelindəki payına mənfi təsir göstərir. Bu mənada kirayə mənzil bazarında tələb yüksək olduğu üçün ilbəil qiymət artımına gətirib çıxarır. Hesab edirəm ki, bu tendensiya bu il də davam edəcək”.