ABŞ-də yüksəklikdə olan təyyarənin qapısı partladı - Qorxulu anlar
ABŞ-nin Oreqon ştatının Portlend şəhərindən Kaliforniyanın Ontario şəhərinə uçan sərnişin təyyarəsində qorxulu anlar yaşanıb.
1news.az xarici KİV-lərə istinadən xəbər verir ki, Alyaska Hava Yollarına məxsus Boeing 737 Max 9 sərnişin təyyarəsinin təcili çıxış qapısı naməlum səbəbdən təzyiqin düşməsi nəticəsində 16 min fut yüksəklikdə partlayıb.
Aeroporta qayıtdı
Alyaska Hava Yolları tərəfindən edilən şərhdə, bu ifadələrdən istifadə edilərək ətraflı bir açıqlama verilmədi: "1282 saylı uçuş axşam saatlarında havaya qalxdıqdan qısa müddət sonra Portlendə təhlükəsiz şəkildə geri endi." Federal Aviasiya Administrasiyasından verilən açıqlamada ekipajın "təzyiq problemi" olduğunu bildirdiyi və hadisə ilə bağlı araşdırma aparıldığı bildirilib. "Alyaska Airlines", donanmasında olan 65 Boeing 737 Max 9 təyyarəsini müvəqqəti olaraq dayandırdığını açıqladı.
Oksigen maskaları endirilib
Hadisə zamanı xəsarət alan olmasa da, sərnişinlərin sosial şəbəkədə paylaşdıqları foto və videolarda təyyarənin pəncərəsində böyük bir açılış olduğu və oksigen maskalarının asıldığı görünür.
ABŞ Federal Aviasiya Administrasiyası bəzi "Boeing 737 MAX 9" tipli təyyarələrin uçuşlarının müvəqqəti olaraq dayandırılacağını açıqlayıb. Türk Hava Yolları donanmasında olan 5 ədəd “Boeing 737 MAX 9”təyyarəsini ilk eniş edəcəyi hava limanındakı əməliyyatlardan geri çəkməyə qərar verib.
