1news.az

Koronavirusa görə İrandan gətirilən məhsullar bahalaşacaq – EKSPERT

24 Fevral saat 14:55 ~ 2 dəqiqəlik oxu 307
Koronavirusa görə İrandan gətirilən məhsullar bahalaşacaq – EKSPERT

İranda koronavirusun yayılması İrandan Azərbaycana gətirilən məhsulların həcminə və strukturuna təsir göstərəcək.

Bunu 1news.az-a açıqlamasında tanınmış iqtisadçı ekspert Vüqar Bayramov deyib.

“İran Azərbaycan üçün vacib ticarət tərəfdaşlarından biridir. İran-Azərbaycan arasında ticarət dövriyyəsi 446 milyon dollardır. 404,8 milyon dolları İrandan Azərbaycana idxaldır, 31,2 milyon dolları Azərbaycanın İrana ixracıdır.

Göründüyü kimi biz İrandan daha çox məhsul idxal edirik. Bu baxımdan Azərbaycanın İrandan idxalı ölkəmizin İrana ixracından 13 dəfə çoxdur. Bütün bunları nəzərə alsaq belə nəticəyə gələ bilərik ki, İranda koronavirusun yayılması İrandan Azərbaycana gətirilən məhsulların həcminə və strukturuna təsir göstərəcək”.

Faiz etibarı ilə İrandan Azərbaycana daha çox kənd təsərrüfatı və qida məhsullarının idxal edildiyini deyən eksper hesab edir ki, buna görə də bu məhsullar bahalaşacaq:

“Azərbaycana İrandan daha çox kənd təsərrüfatı məhsulları gətirilir. Eyni zamanda quru meyvələr, yüngül sənaye məhsulları, xüsusən də məişətdə istifadə edilən sənaye məhsulları idxal edilir.

Əgər koronavirusun miqyası genişlənərsə, İrandan Azərbaycana məhsul gətirilməsi dayanarsa, bu, böyük bahalaşmaya səbəb olacaq. Xüsusən kənd təsərrüfatı məhsullarının qiymətinə ciddi təsir göstərəcək. Çünki qiyməti daha ucuz olan kənd təsərrüfatı məhsulları Azərbaycana İrandan gətirilir. Əgər bu məhsulların idxalında çətinliklər yaranarsa, təbii olaraq onların qiyməti artacaq”.

V.Bayramovun sözlərinə görə, hələlik İrandan idxal edilən yüngül sənaye məhsullarının qiymətində qida məhsullarında olduğu kimi ciddi artımlar proqnozlaşdırılmır:

“Koronavirusun yayılma səviyyəsi nəzərə alınsa, həmin məhsullarının idxalının davam etməsi, həm də bu məhsulların alternativ olaraq Rusiya və Türkiyədən idxal olunması hesabına kompensasiya edilə bilər.

Amma ucuz kənd təsərrüfatı məhsullarının idxalını Türkiyə hesabına kompensasiya etməkdə müəyyən çətinliklər var. Bu da Türkiyədən idxal edilən kənd təsərrüfatı məhullarının qiymətinin İranla müqayisədə yüksək olması ilə bağlıdır”.

1news.az

OXUCULARIN SEÇİMİ
REDAKSİYANIN SEÇİMİ
Cəmiyyət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2020 "The First News" İnformasiya Agentliyi,,
Bütün hüquqlar qorunur
entonee.net