1news.az

Taksidə siqaret çəkən sürücülərə XƏBƏRDARLIQ

25 Fevral saat 11:10 ~ 2 dəqiqəlik oxu 573
Taksidə siqaret çəkən sürücülərə XƏBƏRDARLIQ

Siqaret həm onu çəkən, həm də ətrafdakılar üçün ziyanlıdır. Dünyanın bir çox yerində olduğu kimi Azərbaycanda da ictimai yerlərdə siqaret çəkməyə qadağa qoyulur.

İctimai nəqliyyatda – avtobus və taksilərdə də tütündən istifadə qanunla qadağandır. Avtobuslarda bu qaydalara riayət olunsa da, taksilərdə bu qaydalara məhəl qoyulmadığını görürük. Bəs görəsən taksi fəaliyyəti ilə məşğul olanlar nəqliyyat vasitəsində siqaret çəkməyə görə məsuliyətə cəlb olunurmu?

Məsələ ilə bağlı 1news.az-a danışan hüquqşünas Ərşad Hüseynov deyib ki, Azərbaycanda "Tütün məmulatlarının istifadəsinin məhdudlaşdırılması haqqında Azərbaycan Respublikasının Qanunu” var.

“Həmin qanunda göstərilir ki, istənilən ictimai nəqliyyatda həm sərnişinin, həm sürücünün özünün tütündən istifadəsi qadağandır. Bu qadağanın pozulmasına görə İnzibai Xətalar məcələsinin 322.0.4. müntəzəm şəhərdaxili (rayondaxili), şəhərlərarası (rayonlararası) və beynəlxalq marşrutlar üzrə hərəkət edən avtobusda, sərnişin daşımaları üzrə ümumi istifadədə olan avtomobil nəqliyyatı vasitəsində və taksi minik avtomobilində tütün çəkilməsinə görə 40 manatdan 50 manatadək məbləğdə cərimə tətbiq edilir.

Cəriməni tətbiq etmə səlahiyyəti dövlət yol polisinə aiddir. Amma çox nadir hallarda polis əməkdaşları tərəfindən bu qayda pozuntusuna görə cərimə yazılır. Bu sahədə maarifləndirmə işlərini aparmaq lazımdır. Polisin işi çoxdur, amma hərdən rastlaşanda cərimə də tətbiq etmək lazımdır. Maarifləndirmənin üsullarından biri də budur. Nəyinsə qadağan olduğunu deyəndə adətən yola verilir, amma 1-2 dəfə cərimə tətbiq ediləndən sonra qayda pozmamağa çalışırlar. Avtomobildə siqaret çəkməmək üçün pul xərcləməyə, əlavə nəsə almağa ehtiyac yoxdur, sadəcə məsuliyyətli olmaq lazımdır. Siqaret çəkmək həm insanın özü üçün, həm də ətrafdakıların sağlamlığı üçün təhlükəlidir”.

Baş Dövlət Yol Polisi İdarəsi (BDYPİ) İdarənin İctimaiyyətlə əlaqələr şöbəsinin rəisi, polis polkovniki Kamran Əliyevin sözlərinə görə, əgər yol polisi görsə ki, taksi fəaliyyəti ilə məşğul olan sürücü sükan arxasında siqaret çəkir, o halda saxlayıb ona inzibati xəta haqqında protokol tərtib edə bilər.

“Taksi fəaliyəti ilə məşğul olan adam çalışmalıdır ki, apardığı müştəriləri narahat etməmək xatirinə tütün məhsullarından istifadə etməsin. Yəni tək inzibati məsuliyyə görə yox, həm də müştəri məmnuniyyətinə görə tütün məhsullarından istifadə etməməlidirlər. Ümumilikdə nəqliyyat vasitəsində siqaretdən istifadəni aşkarlamaq çətindir, çünki sürücülər polisi görəndə siqareti gizlədə bilər və ya müştəri avtomobilə minəndən sonra taksi emblemini götürə bilərlər. İstənilən halda taksidə və ya avtobusda tütün məhsullarından istifadə qadağandır”.

Qafar Ağayev

OXUCULARIN SEÇİMİ
REDAKSİYANIN SEÇİMİ
Cəmiyyət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2020 "The First News" İnformasiya Agentliyi,,
Bütün hüquqlar qorunur
entonee.net