Bakının əsas küçələrindən birində təmir işlərinə başlanılıb –FOTO-VİDEO
Bakının Nizami rayonundakı Naxçıvanski küçəsində Qara Qarayev prospektindən Bəkir Çobanzadə küçəsinə doğru istiqamətdə təmir işlərinə başlanılıb.
Bu haqda 1news.az-a “Azəryolservis” ASC-nin mətbuat xidmətinin rəhbəri Anar Nəcəfli məlumat verib.
Məlumatda bildirilir ki, yolun 850 metrlik hissəsi texnoloji ardıcıllığa riayət olunmaqla yüksək keyfiyyətlə təmir edilib. Təmir-tikinti işləri çərçivəsində küçənin köhnə asfalt-beton örtüyü qaşınaraq, ərazidən daşınıb. Bundan sonra əraziyə yeni asfalt-beton örtüyü döşənib. Ümumilikdə təqribən 8500 kvadratmetr sahənin asfaltlanması işləri aparılıb.
Ortalama eni 9 metr olan küçəyə 1560 paqon-metr yeni səki daşları düzülüb, kommunikasiya xətlərinin dəmir-beton plitələri qaldırılaraq 34 ədəd yeni baxış qapağı qoyulub və zəruri olan yerlərdə yağış barmaqlıqları yenilənib.
Təmir-tikinti işlərininyaxın zamanlarda bitirilməsi planlaşdırılır. Aparılan işlərlə əlaqədar sürücülərdən görülən işlərə anlayışla yanaşmalarını xahiş olunur.
1news.az
