Sərhəddən siqaret və narkotik maddə keçirmək istəyən şəxslər tutulublar
Dövlət Sərhəd Xidmətinin (DSX) əməkdaşları qanunsuz yolla sərhəddən siqaret və narkotik maddə keçirmək istəyən şəxsləri saxlayıb.
1news.az-ın məlumatına görə, 07.01.2016-cı il tarixdə həyata keçirilmiş tədbirlər nəticəsində Biləsuvar rayonu ərazisindəki sərhəd zastavasının xidməti sahəsində Biləsuvar rayon sakinləri Cəfərov Fuad Abbasqulu oğlu və Rəhimov Samir Ataş oğlu 1000 qutu “MM” markalı və 470 qutu “Continental” markalı siqaretləri dövlət sərhədindən keçirməyə cəhd göstərərkən saxlanılıblar.
09.01.2016-cı il tarixdə isə həmin sərhəd zastavanın xidməti sahəsində həyata keçirilmiş əməliyyat-axtarış tədbirləri nəticəsində Lənkəran rayon sakinləri Əliyev Rövşən Tofiq oğlu, İbişov Elşad Rafiq oğlu və Qasımzadə Musa Azad oğlu narkotik vasitə olan 3,9 kq həşiş qətranı və 3,7 kq marixuana ilə saxlanılıblar.
Hər iki fakt üzrə DSX tərəfindən əməliyyat-istintaq tədbirləri davam etdirilir.
1news.az
