Keçən il axtarışda olan 86 şəxs saxlanılıb

Bakı şəhər Baş Polis İdarəsi ilə birgə razılaşdırılmış vahid dislokasiya planına uyğun həyata keçirilən tədbirlər çərçivəsində 27564 şəxs saxlanılıb.

1news.az-ın məlumatına görə, bunu Əlahiddə Çevik Polis Alayının komandiri, polis polkovniki Zaur Abdullayev 2015-ci il ərzində görülmüş işlərin yekunlarına və qarşıda duran vəzifələrə həsr olunmuş əməliyyat müşavirəsində çıxışı zamanı deyib. Z.Abdullayev bildirib ki, o cümlədən müxtəlif cinayətlər törətmiş 835, inzibati xətalara yol vermiş 26729 nəfər saxlanılaraq barələrində qanunauyğun tədbirlərin görülməsi təmin edilib.

Həmin şəxslərdən 86-sı axtarışda olanlar, 243-ü  xuliqanlıq, 81-i dələduzluq, 103-ü narkotik vasitələrin qanunsuz dövriyyəsi ilə bağlı, 245-i oğurluq, 26-ı soyğunçuluq və s. cinayətləri törətdiklərinə görə saxlanılanlardır.  

Eyni zamanda, yol hərəkəti qaydaları əleyhinə olan inzibati xəta törətmiş 5.803, o cümlədən 2399 piyada, məişət  səs-küyünə yol vermiş 2173, qanunla müəyyən edilməmiş yerlərdə küçə ticarəti ilə məşğul olan 3115, digər inzibati xətalara görə 13239 nəfər müəyyən edilərək rayon polis idarələrinin aidiyyatı polis bölmələrinə təhvil verilib.

1news.az