Mədət Quliyev: “Rayonlardakı etiraz aksiyaları manatın devalvasiyası ilə bağlı deyildi”

“Bəzi rayonlarda baş verən etiraz aksiyaları manatın devalvasiyası ilə bağlı deyildi”.

1news.az-ın “Report”-a istinadən verdiyi xəbərə görə bunu bunu jurnalistlərə açıqlamasında Dövlət Təhlükəsizliyi Xidmətinin (DTX) rəisi, general-leytenant Mədət Quliyev deyib.

“Sadəcə, işləmək istəməyən insanlar belə bir cəhd edirlər. Deyirlər, bankdan pul götürmüşük, bu pullar silinsin. Bu məsələləri dövlət başçısına məruzə etdik”- deyə, M.Quliyev əlavə edib.

Bütün dünyada, o cümlədən, neft ölkələrində böhranın baş verdiyini deyən Xidmət rəisi bildirib ki, Azərbaycanda bu vəziyyətin aradan qaldırılması üçün analoqu olmayan addımlar atılır:

“Baxın, ölkədə unun qiyməti aşağı salındı, digər ərzaqların da qiymətləri nəzarətdə saxlanılır. Milli valyutamızın dəyərini qoruyub-saxlamağa çalışırıq. Hər şey Prezident İlham Əliyevin nəzarətindədir”.

M.Quliyev rəhbərlik etdiyi qurumun fəaliyyəti ilə bağlı da danışaraq qurumun əməkdaşlarının sayının 30 faiz azaldıldığını diqqətə çatdırıb:

“Dövlət Təhlükəsizliyi Xidməti və Xarici Kəşfiyyat Xidməti yaradılanda qarşımıza tələb qoyuldu ki, hər iki qurum müasir tələblərə cavab verməlidir. Bizə bir ay vaxt verilmişdi. Bu müddət ərzində gördüyümüz işlərlə bağlı dövlət başçısına məlumat verdik. İndi öz səlahiyyətlərimiz çərçivəsində fəaliyyətimizi davam etdiririk.

Əməkdaşların sayını 30 faiz azaltmışıq. Planımız odur ki, əməkdaşlarımızın fəaliyyəti daha operativ və çevik olsun. İki qurum arasında işgüzar münasibətlər var. Məlumat mübadiləsi aparırıq. Həmin qurumda da kadrlarla bağlı islahatlar aparılır”.

M.Quliyev DTX-nin şöbələrinin bütün şəhərlərdə olmasına lüzum olmadığını da söyləyib:

“Bəzi şəhərlərdən kuratorluq əsasında məlumatlar toplayacağıq. Sərhədyanı rayonlarda daha güclü iş aparacağıq”.

1news.az