Əmək və Sosial Münasibətlər Akademiyası Türkiyə universiteti ilə əməkdaşlıq protokolu imzalayıb

Azərbaycan Əmək və Sosial Münasibətlər Akademiyası (AƏSMA) Türkiyənin Manisa Cəlal Bayar Dövlət Universiteti ilə əməkdaşlıq protokolu imzalayıb. Protokola əsasən iki ali təhsil ocağı arasında müəllim və tələbə mübadiləsi, birgə tədbirlərin keçirilməsi nəzərdə tutulur.

1news.az-ın AZƏRTAC-a istinadla verdiyi xəbərə görə, bununla əlaqədar Manisa Cəlal Bayar Dövlət Universitetinin rektoru, professor Əhməd Kamal Çələbinin rəhbərliyi ilə bu ali məktəbin bir qrup əməkdaşı akademiyada olub.

Görüşdə akademiyanın rektoru, professor Hüseyn Qaraşov müasir dövrün tələblərinə uyğun, beynəlxalq standartlara cavab verən yüksək səviyyəli kadrların hazırlanmasında xarici universitetlərlə əməkdaşlığın rolundan danışıb. Rektor vurğulayıb ki, bizim əməkdaşlığımız uğurlarımızın artmasını təmin edəcəkdir. Daha sonra H.Qaraşov qonaqlara akademiyanın tarixi, fəaliyyət strategiyası, əsas hədəfləri və tədris sistemi barədə məlumat verib.

Professor Əhməd Kamal Çələbi rəhbərlik etdiyi ali təhsil ocağı haqqında məlumat verib, yerli və xarici universitetlərlə, eyni zamanda, şirkətlərlə əməkdaşlığın yüksək səviyyəli kadrların hazırlanmasındakı rolundan danışıb. Cəlal Bayar Universitetində elektron universitet sistemi tətbiq olunduğunu, beynəlxalq standartlara uyğun, ingilis dilini və kompyuter proqramlarını yüksək səviyyədə mənimsəyən kadrların yetişdirildiyini vurğulayıb.

Sonra iki ali təhsil ocağı arasında əməkdaşlıq haqqında protokol imzalanıb. Sənədi rektorlar - H.Qaraşov və Əhməd Kamal Çələbi imzalayıblar.

Türkiyəli qonaqlar akademiyada aparılan imtahan prosesi, sosial dərnəklərin fəaliyyəti və tədris binaları ilə tanış olublar.

1news.az