Davosda Dünya İqtisadi Forumu öz işinə başlayıb
“Dördüncü Sənaye İnqilabının Mənimsənilməsi” mövzusunda Davosda 20-23 yanvar tarixlərində keçiriləcək 46-cı Dünya İqtisadi Forumu öz işinə başlayıb.
1news.az-ın “gazeta.ru”ya istinadən verdiyi xəbərə görə, Ümumdünya İqtisadi Forumunun prezidenti Klaus Şvab tədbiri rəsmən açıq elan edib.
"Davos sadəcə konfrans deyil, bu, çox dəyərli bir təcrübədir", deyə Klaus Şvab bildirib.
Bundan əvvəl 46-cı Dünya İqtisadi Forumunun proqramı açıqlanıb.
Dünya İqtisadi Forumunun saytına istinadən verdiyi xəbərə görə, toplantıya 40-dan çox dövlət və hökumət başçıları, habelə biznes və ictimai sektordan olan 2500 lider qatılacaq.
Dünyadakı mövcud çağırışlar, təhlükəsizlik, iqlim dəyişikliyi, qlobal inkişaf və əmtəə qiymətlərinin yeni normaları gündəlikdə olan mövzular arasında olacaq.
Forumda Böyük Britaniyanın baş naziri Devid Kemeron, Türkiyənin baş naziri Əhməd Davudoğlu, Almaniya prezidenti Yoahim Qauk, Yunanıstanın baş naziri Aleksis Tsipras, İraqın baş naziri Heydər əl Abadi, İsrailin baş naziri Benyamin Netanyahu, Rusiya Federasiyasının baş nazirinin müavini Yuri Trutnev iştirak edəcəklər. ABŞ nümayəndə heyətinə vitse-prezident Cozef Bayden rəhbərlik edəcək.
ABŞ dövlət katibi Con Kerrinin də forumda iştirakı gözlənilir.
1news.az
