Polis Braziliyanın keçmiş prezidentini saxlayıb
Braziliya polisi “Petrobras” dövlət neft korporasiyasının fırıldaqçılığı ilə əlaqədar təhqiqat çərçivəsində ölkənin keçmiş prezidenti Luis İnasiu da Silvanın evində axtarış aparıb.
1news.az-ın “İnterfax” informasiya agentliyinə istinadən verdiyi xəbərə görə, sabiq prezident saxlanılıb.
Polis həmçinin da Silvanın oğlu Fabio Luislə əlaqədar olan bir neçə ünvanı da yoxlayıb.
2011-ci ildə prezident postunu tərk edən Luis İnasiu da Silva korrupsiya ilə bağlı ünvanına səsləndirilən bütün ittihamları rədd edir. Müstəntiqlər onu villasını tikdirmək üçün tikinti kompaniyalarından rüşvət almaqda şübhəli bilirlər.
Xatırladaq ki, Braziliyada neft korporasiyasında qurulan korrupsiya sxemi ilə bağlı qalmaqal 2014-cü ilin yazında “Petrobras” kompaniyasının təminat üzrə keçmiş direktoru Paulu Roberto Kostanın həbsindən sonra başlayıb. Həmin vaxtdan indiyə qədər aralarında tanınmış siyasətçilər və biznesmenlərin də olduğu 100-dən çox şəxs həbs edilib.
1news.az
