Heydər Əliyev adına NEZ-də yenidənqurma layihəsi çərçivəsində növbəti müqavilə imzalanıb - FOTO
SOCAR-ın Heydər Əliyev adına neft emalı zavodunda (NEZ) yenidənqurma və modernizasiya layihəsinin reallaşdırılması istiqamətində həyata keçirilən tədbirlər çərçivəsində martın 11-də zavod ilə Amec-Foster Wheeler/SOCAR-Foster Wheeler alyansı arasında İlkin Detallı Layihələndirmə (FEED) işlərinin icrası ilə əlaqədar FEED müqaviləsi imzalanıb.
1news.az-a SOCAR-ın mətbuat xidmətindən bildirilib ki, şirkətin baş ofisində keçirilən imzalanma mərasimdə SOCAR-ın prezidenti Rövnəq Abdullayev, “Amec-FW” şirkətinin Cənubi Avropa üzrə prezidenti, SOCAR-FW Mühəndislik Xidmətləri birgə müəssisəsinin İdarə Heyətinin üzvü Marko Moresko, hər iki şirkətin rəhbər nümayəndələri iştirak ediblər.
SOCAR-ın prezidenti R.Abdullayev Heydər Əliyev adına NEZ-də həyata keçiriləcək yenidənqurma işlərinin əhəmiyyətindən danışıb, layihələndirmə və tikinti işlərinin mərhələli olaraq 2019-2020-ci illərdə həyata keçiriləcəyini qeyd edib. SOCAR-ın prezidenti yenidənqurma mərhələsinə daxil olan qurğular üzrə lisenziar şirkətlərlə müqavilələrin imzalandığını və texnoloji layihələndirmə paketlərinin hazırlanma işlərinin artıq yekunlaşmaq üzrə olduğunu söyləyib.
“Amec-FW” şirkətinin Cənubi Avropa üzrə prezidenti Marko Moresko layihənin növbəti mərhələsi olan İlkin Detallı Layihələndirmə işlərinin həyata keçirilməsini təmin etmək məqsədilə rekonstruksiya layihələrində böyük təcrübəyə malik “Amec-FW” və SOCAR-FW Mühəndis Xidmətləri Alyansının FEED podratçı qismində işlərə cəlb edilməsindən məmnunluğunu ifadə edib.
Müqaviləni Heydər Əliyev adına neft emalı zavodunun direktoru Elman İsmayılov, “Amec-FW” şirkətinin kommersiya əməliyyatları üzrə direktoru Enzo Gioviale və SOCAR-FW Mühəndislik Xidmətləri birgə müəssisəsinin baş direktoru Elməddin Dadaşov imzalayıblar.
Qeyd edək ki, “Amec-FW” artıq SOCAR-ın “Star” layihəsində əvvəlcə FEED podratçı qismində, hazırda isə PMC qismində işlərə cəlb edilib. Eyni zamanda, “Amec-FW” SOCAR ilə yaradılan birgə müəssisəsi vasitəsilə Neft-Qaz Emalı və Neft-Kimya Kompleksi (NQENKK) layihəsində bir sıra mühəndislik işlərini, Heydər Əliyev adına NEZ-də isə ilkin mühəndislik işlərini həyata keçirib. Birgə müəssisənin yaradılmasında əsas məqsəd yüksək ixtisaslı yerli kadrların hazırlanmasıdır. Birgə müəssisənin Azərbaycanda cəlb olunduğu bütün layihələrdə yerli kadrlar üçün “Amec-FW” şirkətinin Milan ofisində təlimlər təşkil edilir.
1news.az
