Yaponiya Suriyaya yardım ayıracaq
Yaponiya Suriyanın çətin gedilən rayonlarının sakinləri üçün əlavə 5 milyon dollar yardım ayıracaq.
1news.az-ın AZƏRTAC-a istinadla verdiyi xəbərə görə, bu haqda Yaponiya Xarici İşlər Nazirliyinin məlumatında qeyd olunur.
Məlumatda bildirilir ki, vəsait Suriyanın mərkəzdən uzaq regionlarında ərzaq yardımı göstərilməsi və su təchizatının bərpası üçün istifadə ediləcək. Bundan əlavə, vəsaitin bir hissəsi təcili tibbi yardımın yaxşılaşdırılmasına və ərazilərin minalardan təmizlənməsinə sərf olunacaq.
Cari ilin yanvarında xarici işlər naziri Fumio Kişida bildirmişdi ki, Tokio Suriyada və Yaxın Şərqdə vəziyyətin sabitləşməsi üçün 350 milyon dollar ayıracaq.
Qeyd edək ki, Yaponiyanın Baş naziri Şinzo Abe isə 2015-ci il sentyabrın 29-da BMT Baş Məclisinin sessiyasında çıxış edərkən Tokionun Suriya və İraqdan olan qaçqınlara yardım məqsədilə 810 milyon dollar ayıracağını bildirmişdi.
1news.az
