Suriya ilə bağlı danışıqlar prosesi apreldə davam etdiriləcək

Suriyada vətəndaş müharibəsinə son qoyulması məqsədilə İsveçrənin Cenevrə şəhərində keçirilən danışıqlar aprelin 9-dan sonra davam etdiriləcək və əsas diqqət siyasi keçid prosesinə yönələcək.

1news.az xəbər verir ki, bu barədə BMT-nin Suriya üzrə xüsusi elçisi Staffan de Mistura bu gün Cenevrədə mətbuata açıqlamasında məlumat verib.

Ötən günlər ərzində BMT-nin Cenevrə bölməsində aparılan danışıqlarda Suriya hökumətini və müxalifəti təmsil edən nümayəndə heyətlərinin görüşü və bu görüşün nə zaman baş tutması barədə razılıq əldə edilməyib. S.de Mistura nümayəndə heyətləri ilə danışıqları ayrı-ayrılıqda keçirməli olub. ABŞ və Rusiyanın xarici işlər nazirləri münaqişə tərəflərini birbaşa danışıqlar üçün görüşməyə çağırıblar.

Suriya hökumətini təmsil edən nümayəndə heyəti ölkə başçısı Bəşər Əsədin siyasi gələcəyinin danışıqların mövzusu olmasına qəti etirazını bildirib. Nümayəndə heyəti apreldəki Cenevrə danışıqlarının gedişindən asılı olmayaraq, aprelin 13-də Suriyada parlament seçkilərinin keçiriləcəyini elan edib və yalnız bundan sonra Cenevrədə danışıqların mümkün olacağını bildirib. Müxalif qruplar isə parlament seçkilərini qeyri-legitim hesab edirlər.

S.de Mistura mətbuat nümayəndələrinə son günlərdə aparılan danışıqların nəticəsinin on iki bəndlik sənəddə əksini tapdığını da bildirib. Sənədin əsas məğzi ölkənin suverenliyinin qorunub saxlanması, heç bir regionun ölkənin tərkibindən çıxmaması və digər məsələlərdir.

1news.az