İran ölkə ərazisində atışmanı təsdiq edib və hadisə bir daha təkrarlanarsa sərt addımlar atacağı ilə bağlı hədələyib
İran rəsmiləri ölkə ərazisində atışmanı təsdiq edib, lakin əsas günahkarı göstərməyib.
“Azərbaycan və Ermənistan arasında gedən döyüşlər zamanı İranın Dağlıq Qarabağa yaxın kəndlərindən birinə 3 minaatan mərmi düşüb”, - bu haqda Şərqi Azərbaycan əyalətinin general-qubernatoru bildirib, Farsnews.com xəbər verir.
Məmurun sözlərinə görə, İran sərhədçiləri Azərbaycan və Ermənistanı ölkə ərazisinə atəş açmamaqda xəbərdarlıq edib.
“Hazırda Şərqi Azərbaycan əyalətinin sərhədində təhlükəsizlik bərpa edilib. Lakin ölkəmizin ərazisinə istənilən müdaxiləyə sərt addım atacağıq”, - deyə qubernator qeyd edib.
Xatırladaq ki, daha əvvəl Azərbaycan və Ermənistan arasında gedən döyüşlər zamanı Dağlıq Qarabağa yaxın Şərqi Azərbaycandakı İran kəndinə 3 minaatan mərmisi düşüb.
1news.az-ın verdiyi xəbər görə, İran ərazisi məhz erməni silahlı qüvvələri tərəfindən atəşə məruz qalıb. Buna görə, bu bildiriş ilk növbədə Ermənistana aiddir.
Düzgün olardı ki, İran tərəfi ilk olaraq əsas günahkarı konkret olaraq göstərsin, ümumi bəyanat verməsin.
Mövzu ilə əlaqdar oxuyun:
Ermənilərin atdığı top mərmilərinin bir neçəsi Cənubi Azərbaycan ərazisinə düşüb –VİDEO
Daha əvvəl Günaz TVxəbər vermişdi ki, İranda yaşayan azərbaycanlılar Araz çayının kənarına toplaşaraq Azərbaycan Silahlı Qüvvələrinə dəstəklərini göstəriblər.
Qeyd edək ki, aprelin 3-də Azərbaycanın müdafiə naziri general-polkovnik Zakir Həsənov İran İslam Respublikasının müdafiə və silahlı qüvvələrə dəstək naziri general-mayor Hüseyn Dehqan ilə qoşunların təmas xəttində yaranmış gərginliyi telefon vasitəsilə müzakirə ediblər.
Danışıqlar zamanı general-mayor H.Dehqan İran İslam Respublikasının Azərbaycanın ərazi bütövlüyünü tanıdığını bir daha qeyd edərək Ermənistan-Azərbaycan, Dağlıq Qarabağ münaqişəsinin qısa müddət ərzində beynəlxalq hüquq normaları əsasında həll olunacağına ümid etdiyini bildirib.
O, İranın Azərbaycan tərəfinə münaqişənin həll olunması istiqamətində yardım və dəstəyini təklif edib.
Xatırladaq ki, hərbi cəhətdən iflasa uğrayan Ermənistan kriminal rejimi son vaxtlar cəbhədəki uğursuzluqlarının, canlı qüvvə və döyüş texnikası sarıdan xeyli itkisinin əvəzini çıxmaq məqsədilə növbəti dəfə təxribat törətməyə çalışıb.
Aprelin 2-nə keçən gecə bütün cəbhəboyu mövqelərimiz iriçaplı silahlar, minaatanlar, qumbaraatan və artilleriya qurğularından intensiv atəşə tutulub. Eyni vaxtda qoşunların təmas xəttinə yaxın mülki əhalinin kompakt yaşadığı bir sıra yaşayış məntəqələri də düşmən atəşinə məruz qalıb. Qarşı tərəfin hərbi aktivliyini genişləndirməyə imkan verməmək, onun fəaliyyətinin qarşısını almaq məqsədilə Silahlı Qüvvələrimizin komandanlığı tərəfindən əməliyyat şəraiti qiymətləndirilərək dərhal cavab tədbirlərinin görülməsi üçün qərar verilib.
Cəbhənin ən gərgin Ağdərə-Tərtər-Ağdam və Xocavənd-Füzuli istiqamətində yerləşən birliklər, artilleriya bölmələri və digər qoşun növlərinin birgə, əlaqəli fəaliyyəti nəticəsində qısa müddətdə Ermənistan silahlı bölmələrinə qarşı cavab tədbirləri həyata keçirilir.
“Qısa müddətdə həyata keçirilən sürətli əks-həmlə zamanı erməni birləşmələrinin uzun illərdən bəri mühəndis-istehkam baxımından möhkəmləndirdiyi birinci müdafiə xətti cəbhənin bəzi istiqamətlərində yarılıb, strateji əhəmiyyətə malik bir neçə yüksəklik və yaşayış məntəqələri düşməndən tam azad olunub”, - Müdafiə Nazirliyinin məlumatında qeyd olunur.
Həmçinin Müdafiə Nazirliyinin məlumatında qeyd olunur ki, Goranboy rayonu və Naftalan şəhərinə təhlükə yarada biləcək Talış kəndi ətrafındakı yüksəkliklər, eləcə də Seysulan məntəqəsi düşmən qüvvələrindən tam təmizlənib. Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən strateji əhəmiyyətli "Lələ təpə" adlandırılan yüksəklik də bölmələrimizin nəzarətinə keçib.
Hazırda həmin yüksəkliklər və yeni müdafiə xətti boyu müvafiq gücləndirmə tədbirləri həyata keçirilir, yeni səngərlər qazılır və mövqelərdə möhkəmləndirmə işləri aparılır. Döyüşlərdə ermənilərə məxsus 6 ədəd tank, 15-dək artilleriya qurğusu və möhkəmləndirilmiş mühəndis qurğuları məhv edilib, o cümlədən yüzdən çox hərbi qulluqçusu ölüb və yaralanıb.
Düşmənlə döyüşlərdə Silahlı Qüvvələrimizin 12 hərbi qulluqçusu şəhid olub. Erməni mövqelərinə aviasiya zərbələri zamanı əməliyyata cəlb olunan 1 ədəd Mi-24 helikopteri düşmən tərəfindən vurulub və 1 ədəd tank mina partlayışı zamanı sıradan çıxıb.
Müdafiə Nazirliyi bildirir ki, atəşkəs rejimi haqqında razılaşmanın Ermənistan tərəfindən pozulması təkrarən baş verərsə düşmənə vurulacaq zərbələr daha ağır və sarsıdıcı olacaq.
1news.az
