Türkiyə ictimaiyyəti Ermənistanın təcavüzkar siyasətinin nəticələri barədə məlumatlandırılıb - FOTO

Azərbaycanın Türkiyədəki səfiri Faiq Bağırov bu ölkənin “24 TV” televiziyasına müsahibəsində Ermənistan-Azərbaycan, Dağlıq Qarabağ münaqişəsi ilə bağlı həqiqətlərdən danışıb.

1news.az-ın AZƏRTAC-a istinadla verdiyi xəbərə görə, Türkiyənin digər KİV-inin də yaydığı müsahibədə saxta “erməni məsələsi”, uydurma “Böyük Ermənistan” iddiası, Ermənistan-Azərbaycan münaqişəsini yaradan və həll edilməsinə mane olan səbəblər və s. məqamlar barədə məlumat verilir.

Aprelin ilk günlərindən başlayaraq Ermənistan-Azərbaycan qoşunlarının təmas xəttində təcavüzkar tərəfin təxribatları ucbatından gərginləşmiş hərbi qarşıdurmanın nəticələrindən danışan səfir diqqətə çatdırıb ki, düşmənə layiqli cavab verən Azərbaycan ordusu hansı qüdrətdə olduğunu nümayiş etdirib.

Müsahibədə Azərbaycan dövlətinin sülh və humanizm siyasəti, ermənilərin Azərbaycan və Türkiyə xalqlarına qarşı törətdikləri terror aktları, erməni toplumunun Azərbaycan torpaqlarına köçürülməsi siyasətinin məqsədləri kimi məsələlərə aydınlıq gətirilib.

Səfir deyib ki, təcavüzkar Ermənistanın, dünya ermənilərinin, o cümlədən bu mənfur qüvvələri himayə edənlərin hədəfi təkcə Azərbaycan yox, həm də Türkiyədir.

1news.az