Avstriyada prezident seçkilərində sağçı-radikal partiyanın namizədi ilk turda qələbə qazanıb
Aprelin 24-də Avstriyada keçirilən növbəti prezident seçkilərində sağçı-radikal Avstriya Azadlıq Partiyasının namizədi Norbert Hofer gözlənilmədən bütün rəqiblərini qabaqlayaraq, seçkilərin ilk turunda qalib gəlib.
Yerli vaxtla saat 17-də seçki məntəqələri bağlandıqdan sonra elan edilən ilkin nəticələrə əsasən, Norbert Hofer 36,6 faiz səs toplayıb. Sonrakı yerlərdə Yaşıllar Partiyasının sabiq sədri, müstəqil namizəd Aleksandr Van der Bellen (21,1 faiz) və müstəqil namizəd İrmqard Qriss (18,8 faiz) dayanır.
Ölkənin iki böyük siyasi qüvvəsi olan və koalisiyalı hökumətdə təmsil olunan Avstriya Sosial-Demokratlar Partiyasının (SPÖ) namizədi Rudolf Hundstorfer və Avstriya Xalq Partiyasının (ÖVP) namizədi Andreas Kohl isə müvafiq olaraq 11,3 faiz və 11,2 faiz səslə kifayətlənməli olublar.
May ayında keçiriləcək seçkilərin ikinci turunda Norbert Hoferin rəqibi aprelin 25-də səslərin əksər hissəsi hesablandıqdan sonra müəyyənləşəcək.
Səsvermədə ən son pillədə qərarlaşan tikinti maqnatı Rixard Luqner isə 2,4 faizlə kifayətlənməli olub.
Avstriyada prezident seçkilərində səsvermə hüququna malik 6,38 milyon Avstriya vətəndaşının 68,3 faizi iştirak edib.
Avstriyanın hazırkı Federal Prezidenti Haynts Fişerin səlahiyyət müddəti bu il iyulun 8-də başa çatır.
AZƏRTAC
