Sarkisyan Müdafiə Nazirliyinin yüksək çinli məmurlarını işdən çıxartdı

Ermənistan prezidenti Serj Sarkisyan Müdafiə Nazirliyinin bir neçə yüksək vəzifəli şəxsini işdən azad edib.

1news.az-ın Ermənistan mətbuatına istinadən verdiyi xəbərə görə, S. Sarkisyanın fərmanı ilə müdafiə nazirinin müavini, nazirliyin maddi-texniki təminat departamentinin rəisi Alik Mirzabekyan vəzifədən azad edilib.

Bundan başqa S. Sarkisyanın imzaladığı digər fərmanları ilə Ermənistan Silahlı Qüvvələri Baş Qərargahının kəşfiyyat idarəsinin rəisi, general-mayor Arşak Karapetyan, eləcə də rabitə qoşunlarının rəisi, Müdafiə Nazirliyinin rabitə və avtomatlaşdırılmış idarəetmə sistemləri idarəsinin rəisi, general-mayor Komitas Miradyan da tutduqları vəzifələrdən azad ediliblər.

1news.az