Küveyt hesab edir ki, neft hasilatının dondurulmasına alternativ yoxdur

Neft ixracatçılarının hasilatın indiki həcminin səviyyəsini dondurmaqdan başqa çarəsi yoxdur.

Bu fikri Küveytin xarici işlər nazirinin müavini Xalid Süleyman əl-Caralla səsləndirib.

Xatırladaq ki, neft hasil edən ölkələr aprelin 17-də Dohada keçirilən görüşün yekunlarına əsasən hasilatın səviyyəsinin dondurulması barədə razılığa gəlməyə müvəffəq olmayıblar. Kartelin üzvü olan bir sıra ölkələr, ilk növbədə Səudiyyə Ərəbistanı OPEC-in bütün üzvlərinin, o cümlədən hasilatı yalnız sanksiyalardan əvvəlki həcmə - sutkada 4 milyon barrelə çatdırandan sonra dondurmağa hazır olduğunu bildirən İranın bu sazişdə iştirakını vacib sayıb. Görüşdə iştirak edən Azərbaycan hasilatın dondurulması haqqında sənədi imzalamağa hazır olub.

OPEC ölkələrinin iyunun 2-də keçiriləcək görüşündə neft hasilatının dondurulması məsələsi müzakirə ediləcək.