Hikmət Hacıyev: NATO ölkələri növbəti dəfə Azərbaycanın ərazi bütövlüyünə dəstəklərini ifadə ediblər

Xarici işlər naziri Elmar Məmmədyarov 31 may tarixində NATO-nun mənzil qərargahında keçirilən Azərbaycan-NATO iclası çərçivəsində təşkilatın ali orqanı olan Şimali Atlantika Şurasında çıxış edib.

1news.az-ın verdiyi xəbərə görə, bu barədə Xarici İşlər Nazirliyinin mətbuat xidmətinin rəhbəri Hikmət Hacıyev məlumat verib.

Şimali Atlantika Şurasının NATO-nun ali siyasi qərarverici orqanı olduğunu diqqətə çatdıran XİN rəsmisi bildirib ki, iclasda NATO üzv dövlətlərinin təşkilat yanında daimi nümayəndələri, səfirlərin əksəriyyəti NATO-nun zirvə toplantılarında dövlət və hökumət başçıları səviyyəsində qəbul edilmiş bəyanatlardan çıxış edərək Azərbaycanın beynəlxalq səviyyədə tanınmış sərhədləri daxilində ərazi bütövlüyü və suverenliyinə bir daha dəstək və hörmətlərini ifadə ediblər.  

NATO üzv dövlətlərinin daimi nümayəndələri Vyana görüşündə qeyd olunduğu kimi Ermənistan-Azərbaycan münaqişənin həlli üzrə substantiv və hərtərəfli danışıqlara başlamağı dəstəklədiklərini vurğulayıb və mövcud status kvonun qəbuledilməz və qeyri-davamlı olduğunu bildiriblər.

“Azərbaycanın alternativ mənbə kimi Avropanın enerji təhlükəsizliyində rolu, Azərbaycan əsgərlərinin NATO üzv dövlətlərinin əsgərləri ilə beynəlxalq sülh və təhlükəsizlik naminə çiyin-çiyinə Əfqanıstanda xidməti, Əfqanıstan əməliyyatı üçün Azərbaycanın təmin etdiyi tranzit imkanları, həmçinin Azərbaycanın ikitərəfli əsasda Əfqanıstana davamlı inkişaf təyinatlı dəstəyi üzv dövlətlər tərəfindən yüksək qiymətləndirilib.

Həmçinin, Azərbaycanın Fərdi Tərəfdaşlıq üzrə Fəaliyyət Planı, Planlaşdırma və Analiz Prosesi, Əməliyyat İmkanları Konsepsiyası proqramlarında iştirakı və müəyyən edilmiş məqsədlərin icrasında əldə etdiyi uğurları təqdir edilib”- deyə. H.Hacıyev qeyd edib.

1news.az