“Günəşli” yatağında baş verən yanğın söndürülüb – YENİLƏNİB
Fövqəladə Hallar Nazirliyi (FHN) və SOCAR “Günəşli” yatağında baş verən yanğınla bağlı birgə məlumat yayıblar.
1news.az FHN-ə istinadən xəbər verir ki, sentyabrın 26-da “Azneft” İB-nin “28 May” adına NQÇİ-nin “Günəşli” yatağının 19-cu özülündə 71 saylı quyuda təmir işləri aparılarkən qaz təzahürü meydana çıxıb və açıq fontana çevrilib, saat 18:00 radələrində isə fontanın bağlanması ilə bağlı aparılan işlər zaman qaz təzahürünün ani alışması nəticəsində yanğın hadisəsi baş verib.
Dərhal Dövlət Yanğından Mühafizə Xidmətinin yanğınsöndürən-xilasediciləri özüldə olan 69 nəfəri “Vixr-5” yanğınsöndürmə gəmisinə təxliyə ediblər.
Baş vermiş yanğın SOCAR-ın prezidenti Rövnəq Abdullayevin rəhbərliyi və fövqəladə hallar nazirinin müavini general-leytenant Etibar Mirzəyev və Dövlət Yanğından Mühafizə Xidmətinin rəisi daxili xidmət general-mayoru Füzuli Əsədovun iştirakı ilə Fövqəladə Hallar Nazirliyinin digər aidiyyəti qurumlarla birgə səyləri nəticəsində səhər saatlarında söndürülüb, həmçinin, qaz təzahürünün qarşısı alınıb.
20:59
“Günəşli'” yatağının 19-cu özülündə 71 nömrəli quyuda qəzanın aradan qaldırılması üçün tədbirlər görülür.
Bu barədə 1news.az-a SOCAR-dan bildirilib.
“Günəşli'' yatağının 19-cu özülündə 71 nömrəli quyuda görülən təhlükəsizlik tədbirlərinə baxmayaraq fontan yanğına keçib. Bütün işçilər özüldən təxliyə olunub. Xəsarət alan olmayıb.
Açıq fontanın qarşısının alınması üçün lazımi tədbirlər həyata keçirilir.
1news.az
16.10
Xəbər verdiyimiz ki, sentyabrın 26-da “Azneft” İB-nin “28 May” adına NQÇİ-nin “Günəşli” yatağının 19-cu özülündə 71 saylı quyuda təmir işləri aparılarkən qaz təzahürü yaranıb və yanğın baş verib.
1news.az SOCAR-a istinadən xəbər verir ki, “Xəzər Dəniz Gəmiçiliyi” QSC-nin və FHN-in gəmiləri hadisə yerinə cəlb olunub.
Hazırda hadisənin qarşısının alınması üçün ərazidə 9 gəmi iş aparır.
Qaz təzahürünün qarşısı hələlik alınmayıb, tədbirlər davam etdirilir. Ehtiyac olarsa, əlavə gəmilər də göndəriləcək.
1news.az
