Fidel Kastro öldü

Kuba inqilabının lideri Fidel Kastro ölüb.

1news.az APA-ya istinadən xəbər verir ki, bu barədə Kuba televiziyası məlumat yayıb.

Kuba lideri Raul Kastro da F. Kastronun vəfat etdiyini açıqlayıb.

F. Kastro 90 yaşında dünyasını dəyişib.

Fidel Alexandro Kastro Rus 1926-cı il avqustun 13-də doğulub. Havana Universitetinin hüquq fakültəsində təhsil alıb və tələbəlik illərində Kuba Xalqı Partiyasına qoşulub. 1953-cü ildə o, Kuba diktatoru Fulxensio Batristanın devrilməsi cəhdində iştirak edib. Santyaqo-de-Kubada yerləşən Monkada hərbi kazarmasına hücum zamanı yaxalanıb və məhkəmənin hökmü ilə 15 il müddətinə azadlıqdan məhrum edilib.

1955-ci ildə amnistiya aktı ilə azadlığa buraxılıb. Bir il Meksikada yaşadıqdan sonra 1956-cı ildə “Qranma” kateri ilə öz tərəfdarları, o cümlədən Ernesto Çe Gevara ilə birlikdə Kubanın şərq sahilinə çıxıb. Batista rejiminə qarşı partizan müharibəsi başlayıb və üsyançılar 1959-cu il yanvarın 1-də paytaxt Havananı ələ keçirib. Fidel Kastro yeni qurulan hökumətə başçılıq edib, onun qardaşı Raul isə Silahlı Qüvvələrin komandanı olub. F. Kastro Kubanın sosialist modelə keçdiyini elan edib. 1961-ci ildə ABŞ Kastro rejimini devirməyə cəhd edib, lakin Kubaya yeridilən desant hökumət qüvvələri tərəfindən zərərsizləşdirilib.

Bundan sonra ABŞ Kubaya iqtisadi blokada tətbiq edib. Kastro dövründə Kuba SSRİ ilə müttəfiq olub və sovet dövləti “azadlıq adası”na iqtisadi-hərbi dəstək verib. 1976-cı ildən etibarən, 30 il ərzində komandante Fidel Kuba Dövlət Şurasının və Nazirlər Şurasının sədri, İnqilabi Silahlı Qüvvələrin baş komandanı və ölkənin Milli Müdafiə Şurasının sədri vəzifələrini tutub.

Fidel Kastro 2006-cı il iyulun 31-də səhhətinin pisləşməsi ilə əlaqədar səlahiyyətlərini qardaşı Raula verib. Rəsmi şəkildə səlahiyyətlər 2008-ci ildə Raul Kastroya keçib. 2011-ci il aprelin 19-da Fidel Kastro Kuba Kommunist Partiyasının rəhbərliyindən gedib. Son 5 ildə o, memuarlar yazıb, müxtəlif çıxışlar edib.

1news.az