Türkiyənin daxili işlər naziri İstanbuldakı partlayışların terror aktı olduğunu bildirib - FOTO - VİDEO - YENİLƏNİB

Bir necə dəqiqə əvvəl Ankaradan İstanbula gələn Türkiyənin daxili işlər naziri Süleyman Soylu hava limanında KİV-lərə müsahibə verib.

Nazir ilkin araşdırmalara görə, hadisənin terror aktı olduğunu, partlayışın birinin canlı bomba tərəfindən, digərinin isə bomba yüklü avtomobillə törədildiyini bildirib.

Son məlumata görə, partlayış nəticəsində 40 nəfərədək insan yaralanıb.

Hadisə yerində araşdırmalar davam edir.

X X X

İstanbulun Beşiktaş rayonunda Vodafone Arena stadionu yaxınlğında yerli vaxtla saat 22:30 radələrində (Bakı vaxtı ilə 23:30) törədilən iki partlayış nəticəsində 20 polis əməkdaşı yaralanıb. Bu barədə daxili işlər naziri Süleyman Soylu açıqlama verib.

Partlayış “Beşiktaş”-“Bursaspor” matçının bitməsindən saat yarım sonra çevik polis avtobuslarının yaxınlığında törədilib. Azarkeşlər arasında xəsarət alanların olmadığı bildirilir. Hadisə yeri polis tərəfindən əhatəyə alınıb. İstintaq orqanları araşdırmalara başlayıb.

Daxili işlər naziri Süleyman Soylu və səhiyyə naziri Rəcəb Akdağ Ankaradan İstanbula yola düşüblər.

X X X

Təxminən yarım saat əvvəl İstanbulun Beşiktaş rayonunda Vodafone Arena stadionu yaxınlğında güclü partlayış baş verib.

Daxili işlər naziri Süleyman Soylu hadisə nəticəsində 20-dək insanın yaralandığını bildirib. Hadisə yerinə çoxlu sayda təcili yardım maşınları gəlib.

Yerli KİV-lər stadionun yaxınlığında bomba yüklü avtomobilin partladıldığını xəbər verirlər. Türkiyənin Radio və Televiziya Baş İdarəsi (RTÜK) hadisə yerindən birbaşa yayıma qadağa qoyub.

АZƏRTAC