Bu gün Zeynəb Xanlarovanın doğum günüdür
Bu gün tanınmış müğənni, Azərbaycan və SSRİ Xalq Artisti, Dövlət mükafatı laureatı və bir sıra ordenlər laureatı, musiqi-teatr xadimi və ictimai xadim, Milli Məclisin deputatı Zeynəb Xanlarovanın doğum günüdür.
1news.az-ın məlumatına görə, korifey sənətkarın 80 yaşı tamam olur.
Qeyd edək ki, Zeynəb Yəhya qızı Xanlarova 1936-cı il dekabrın 28-də Bakı şəhərində anadan olub. 1956-cı ildə M.Ə.Sabir adına Bakı Pedaqoji məktəbini və 1961-ci ildə A.Zeynallı adına Bakı Musiqi Məktəbini bitirib.
Z.Xanlarova 1958-ci ildən Azərbaycan Radio və Televiziya Verilişləri Komitəsinin artisti, 1961-ci ildən M.F.Axundov adına Akademik Opera və Balet Teatrının baş solisti olub.
Üzeyir Hacıbəyovun “Leyli və Məcnun”, “Əsli və Kərəm” operalarında Leyli və Əslinin partiyalarını məharətlə ifa edən Z.Xanlarova estrada müğənnisi kimi daha çox uğurlar qazanıb. O, “Şahnaz”, “Qatar”, “Bayatı-Şiraz” təsniflərinin, habelə Azərbaycan bəstəkarları Qara Qarayev, Fikrət Əmirov, Arif Məlikov, Tofiq Quliyev, Cahangir Cahangirov, Rauf Hacıyev, Ələkbər Tağıyev və digər bəstəkar mahnılarının mahir ifaçısıdır. Müğənninin özü də bir neçə mahnı bəstələyib.
Xalq artistinin repertuarında muğamlar, təsnif və Azərbaycan xalq mahnıları, bəstəkar mahnıları, şərq xalqlarının mahnıları geniş yer tutur.
Z.Xanlarova Azərbaycanın qadın xanəndələri arasında “Çahargah” muğamının ilk ifaçılarından biridir. Haqqında “Salam, Zeynəb!” adlı sənədli televiziya filmi çəkilib.
Zeynəb Xanlarova həm də uzun illərdir (1995-ci ildən bugünəcən) Azərbaycan Respublikası Milli Məclisinin deputatıdır. Həmçinin, Azərbaycan SSR Ali Sovetinin (XI-XII çağırış) deputatı olub.
O, Azərbaycan SSR Dövlət Mükafatı laureatı, Ümumittifaq “Qızıl val” mükafatı laureatı, Əlcəzair və Özbəkistanın fəxri vətəndaşıdır. 1967-ci ildə Azərbaycan SSR əməkdar artisti, 1975-ci ildə Azərbaycan SSR xalq artisti, 1980-ci ildə SSRİ xalq artisti adlarına layiq görülüb. 1985-ci ildən Azərbaycan SSR Dövlət mükafatı laureatıdır.
Müstəqil Azərbaycanın “İstiqlal” və “Şöhrət”, dekabrın 26-da isə “Heydər Əliyev” ordeni ilə təltif edilib.
Ailələdir, iki oğlu, bir neçə nəvəsi var.
1news.az
