Mübariz Əhmədoğlu: Sərkisyan avropalılara - Rusiyaya satılıram
Sərkisyan avropalılara - Rusiyaya satılıram Çoxlu maliyyə və siyasi resurs versəniz, sizə də satıla bilərəm. Ermənistan prezidenti S.Sərkisyan Brüsseldə Aİ-nin və NATO-nun rəhbərləri ilə görüşdü. Yayılan məlumatların məzmunundan bəlli olur ki, Ermənistan yenidən avrointeqrasiyaya siyasətini əvvəlki məcraya qaytarıb.
1news.az-ın məlumatına görə, bunu Siyasi İnnovasiya və Texnologiyalar Mərkəzinin sədri, politoloq Mübariz Əhmədoğlu Sərkisyan Brüsseldə Aİ-nin və NATO-nun rəhbərləri ilə ilə bağlı xəbəri şərh edərkən bildirib:
“Amma zaman əvvəlki zaman deyil. Rusiya hərbi sahədə Ermənistanın daxilində çox ciddi irəliləyişlər əldə edib. RF qanunlarına görə “İskəndər” OTRK yalnız Rusiyanın daxilində ola bilər. İttifaq Dövlət Belarusa “İskəndər” verməyən RF Ermənistana verdi. Rusiya vətəndaşları Ermənistana daxili pasportla gəliş-gediş edə bilirlər.
Rusiya Ermənistanı öz daxili subyektlərinə bərabərləşdirmək kursunu final mərhələsinə yaxınlaşdırır. Yaxın vaxtlarda yəqin ki, Avrasiya İqtisadi Birliyinin vətəndaşlığı ideyası Ermənistana tətbiq olunacaq. Belə bir dövrdə S.Sərkisyan Brüsseldə 5-6 il bundan əvvəlki əhval-ruhiyyədə olan bəyanatlar verir. Təbii ki, mənası başa düşüləndir: “Rusiya məni alır, mən Rusiyaya satılıram. Siz, avropalılar çoxlu maliyyə və siyasi resurs versəniz mən sizə də satıla bilərəm”.
Politoloq qeyd edib ki, Avropadakı ağıllılar bunun mümkün olmadığını başa düşürlər. Amma Avropa rəhbərliyində özünü aldatmaq, erməni yalanına inanma hissi də var.
“Yaxınlarda hansının üstünlük təşkil ediləcəyi bəlli olacaq. Brüsseldə Dağlıq Qarabağ tənzimlənməsi ilə bağlı verdiyi bəyanat həqiqi mənada S.Sərkisyanın ya savadsız ya da ruhi xəstə olduğunu göstərir. İstənilən adam S.Sərkisyanın “MİA- Novosti”yə və ondan bir az əvvəl “Blomberq”ə verdiyi müsahibələri oxuyanda reallığın nədən ibarət olduğunu başa düşəcək. “Dağlıq Qarabağ xalqı” mövcud deyil. S.Sərkisyan özü şəxsən “Dağlıq Qarabağ əhalisi” terminini dəfələrlə istifadə edib.
Beynəlxalq hüquqda S.Sərkisyanın dediyi prinsip təsbit olunmayıb. ATƏT Minsk Qrupu sənədlərində belə bir Dağlıq Qarabağ ermənilərinin və yaxud Qarabağ xalqının öz statusunu təyin etmək hüququ yoxdur. Bunun təsdiqi qondarma qurumdakı referendumla bağlı ATƏT-in Minsk Qrupunun həmsədrlərinin son bəyanatıdır.
Aydın görünür ki, Dağlıq Qarabağın statusunu indi Dağlıq Qarabağda yaşayan ermənilər təkbaşına müəyyən edə bilməzlər. Dağlıq Qarabağdan deportasiya olunmuş azərbaycanlılar da ora qayıtmalıdır. Bütün bunlar bəlli olduğu halda ətrafının S.Sərkisyana yol göstərməməsi Ermənistan rəhbərliyinin uçuruma getməklə barışdığını göstərir”.
1news.az
