Dilbərin yaxın rəfiqəsi: Onun yoxluğunu qəbul etmək ağırdır – FOTO

“Dilbər çox parlaq, mehriban və həssas qız idi. O, hər kəsə kömək edərdi”.

Bu haqda 1news.az-a Peterburq metrosunda törədilən qanlı terror qurbanı olmuş Dilbər Əliyevanın yaxın rəfiqəsi – Türkay Cəfərli söyləyib:

“O, həyatsevər idi. Onun həyatla bağlı çoxlu planları vardı – psixoloq olmaq istəyirdi, bu sahə üzrə də təhsil alırdı.

Dostları onu Dilya deyə çağırardı. Onun tam adını çox nadir hallarda söyləyərdilər. Dilya Sankt-Peterburq şəhərini çox sevərdi. Biz onunla bir çox tarixi məkanlarda gəzərdik, şəkillər çəkdirərdik”.

“Onu yaxından tanıdığım üçün deyə bilərəm ki, qısa həyat sürməsinə baxmayaraq Dilbər qarışqanı belə incitmədi. Dilbəri tanıyan hər kəs onu çox sevərdi. O, yaxşı psixoloq olmaq istəyirdi, karyera qurmaq, daha sonra isə ailə həyatı qurmaq istəyirdi. O, həyatdan belə köçmək istəməzdi... onun yoxluğunu qəbul etmək çox ağırdır. Bu, onun yaxınları və ailəsi üçün də ağır itkidir.

Bu gün məsciddə oldum, onun ruhu üçün dualar etdim.

Mən onu çox sevirdim... sadəcə bir söz deyə bilərəm – Allah Dilbərin bütün yaxınlarına və ailəsinə səbr versin!”, - kədərdən boğulan rəfiqəsi deyir.

Türkay və Dilbərin sosial şəbəkədə şəxsi yazışmasından.

Xatırladaq ki, aprelin 3-də Sankt-Peterburq metrosunda terror aktı törədilib. Faciə zamanı 14 nəfər həlak olub ki, bunlardan 13-ü sıravi vətəndaş, bir nəfər isə terrorçu-kamikadze – Akbarcan Cəlilovdur.