Türkiyədə konstitusiyaya dəyişikliyin nəticələri: 54.08% “hə” deyib – YENİLƏNİB
Türkiyədə səsvermə bülletenlərinin sayılması prosesi davam edir.
Bu saatadək bülletenlərin 76.89 %-i sayılıb.
Nəticə belədir: seçicilərin 54.08 faizi konstitusiya dəyişikliyinə “hə”, 46.09 faizi “yox” deyib.
18.19
Bu gün Türkiyədə Konstitusiya dəyişikliyi ilə əlaqədar referendumda səsvermə başa çatıb.
Ölkənin əksər bölgələrində səsvermə yerli vaxtla 08.00 (Bakı vaxtı ilə saat 09.00) başlayıb, saat 17.00-da (Bakı vaxtı ilə saat 18.00) başa çatıb. Türkiyənin şərqində və Qara dəniz bölgələrində isə səsvermə yerli vaxtla saat 07.00-da (Bakı vaxtı ilə saat 08.00) başlayıb, saat 16.00-da (Bakı vaxtı ilə saat 17.00) bitib. Ölkə xaricində yaşayan Türkiyə vətəndaşları artıq səs veriblər. Həmin səslərin nəticəsi ölkədə ümumxalq səsverməsinin nəticələri ilə eyni vaxtda açıqlanacaq.
Referendumda Konstitusiyanın 18 maddəsinin dəyişdirilməsi nəzərdə tutulub. Bunlar Türkiyədə parlament idarəçilik sistemindən prezident üsul-idarəsinə keçid, baş nazir vəzifəsinin ləğvi, Böyük Millət Məclisi üzvlərinin sayının 550 nəfərdən 600 nəfərə çatdırılması, millət vəkili seçilmə yaşının 18-ə endirilməsi, Məhkəmə-Hüquq Şurasının səlahiyyətlərinin dəyişdirilməsi və digər maddələrdir.
APA
