Səfir: Azərbaycanla Pakistan arasında ticarət əlaqələrinin səviyyəsi 10 dəfə artırılmalıdır

Pakistan və Azərbaycan arasında münasibətlərdə bir yüksəliş var. 

1news.az xəbər verir ki, bunu Pakistanın Azərbaycandakı səfiri Said Xan Mohmand deyib. O bildirib ki, iki ölkə aradında bir sıra yüksək səviyyəli səfərlər həyata keçirilib:

“Prezident İlham Əliyev bu il Pakistana səfəri çərçivəsində Prezident Məmnun Hüseyn və digər rəsmi şəxslərlə görüşdü. Bu səfər zamanı siyasi, iqtisadi və ticarət münasibətləri müzakirə olundu. Qeyd edildi ki, ticarət əlaqələrinin səviyyəsi çox aşağıdır və növbəti üç ildə 10 dəfə artırılmalıdır”.

Bu səfərdən sonra iki ölkə arasında əlaqələrin inkişafında yeni mərhələ başladığını deyən səfir hərbi sahədə də əməkdaşlığın inkişaf etdiyini söyləyib:

“Pakistanın fövqəladə hallar naziri Azərbaycanda səfərdə oldu və keçirilən görüşlər zamanı iki ölkənin nazirlikləri arasında əməkdaşlığın gücləndirilməsi müzakirə olundu. Müdafiə naziri Zakir Həsənovla görüşdə isə hərbi əməkdaşlığın inkişafına dair fikir mübadiləsi aparılıb”.

Diplomat deyib ki, bu yaxınlarda Bakıda ticarət üzrə işçi qrupun ilk iclası keçirildi:

“9-12 noyabr tarixlərində Pakistanda “EXPO 2017” sərgisi keçiriləcək. 60-dək ölkənin iştirak edəcəyi bu tədbirə Azərbaycanı da dəvət etmişik”. 

Səfir əlavə edib ki, avqustun 14-də Pakistanın müstəqilliyinin 70-ci ildönümü tamam olur: “Eyni zamanda biz iki ölkə arasında diplomatik əlaqələrin 25-ci ildönümünü qeyd edirik”.

Pərvanə Sultanova