Bakıda Türkiyə Cumhuriyyətinin 94-cü ildönümü ilə bağlı rəsmi qəbul təşkil edilib

Bakıda Türkiyə Cumhuriyyətinin 94-cü ildönümünü münasibətilə rəsmi qəbul təşkil edilib.

1news.az xəbər verir ki, tədbirdə dövlət rəsmiləri, səfirlər, millət vəkilləri, ictimaiyyət nümayəndələri iştirak ediblər.

Türkiyənin Azərbaycandakı səfiri Erkan Özoral deyib ki, bu gün iki ölkənin mübasibətlərində çox mühüm hadisələr baş verir. Bir neçə gün əvvəl Prezident Rəcəb Tayyib Ərdoğanın da iştirakı ilə Bakl -Tbilisi Qars dəmir yolunun açılışı oldu: “Bu ölkələrimizi birləşdirən daha bir vasitədir. Amma təbii ki, iki ölkəni birləşdirən bağlar daha çox və dərindir”. Sonra diplomat Ərdoğanın Cümhuriyyət günü münasibətilə təbrik mesajını səsləndirib.

Baş nazirin müavini Abid  Şərifov Azərbaycan hökuməti və xalqı adından Türkiyə dövlətini və xalqını təbrik edib.

A.Şərifov vurğulayıb ki, Azərbaycan daim Türkiyənin dəstəyini hiss edib və bu dəstək qarşılıqlı olaraq bu gün də davam edir. Bu cür birgə fəaliyyət münasibətlərimizi daha da möhkəmləndirir. A.Şərifov Dağlıq Qarabağ məsələsində daim Azərbaycanın yanında olduğu üçün qardaş ölkəyə təşəkkürünü bildirib.

Hökumət rəsmisi vurğulayıb ki, iki ölkənin əməkdaşlığının böyük potensialı var. Bir neçə gün əvvəl qlobal əhəmiyyətə malik BTQ-nin açılış mərasimi böyük bir tarixi hadisə oldu. Bu dəmir yolu regionda sabitliyi, iqtisadi inkişafı gücləndirəcək və bunun təməlində Azərbaycan və Türkiyənin birgə səyləri dayanır. 

P.Sultanova