“Fitch” Azərbaycan Beynəlxalq Bankının reytinqlərini yüksəldib
“Fitch” Beynəlxalq Reytinq Agentliyi Azərbaycan Beynəlxalq Bankının (ABB) reytinqlərinə yenidən baxıb.
ABB-nin mətbuat xidmətindən 1news.az-a verilən xəbərə görə, “Fitch” bankın xarici valyutada uzunmüddətli reytinqini 4 pillə qaldıraraq “B-“ səviyyəsinə, qısamüddətli reytinqini isə 5 pillə qaldıraraq stabil proqnozla “B” səviyyəsinə yüksəldib.
Agentliyin şərhində qeyd edilir ki, reytinqlərin yüksəldilməsi ABB-nin xarici kreditorlar qarşısındakı öhdəliklərinin könüllü restrukturizasiyası prosesinin 1 sentyabr 2017-ci ildə başa çatdırılması və problemli aktivlərin bankın balansından çıxarılaraq “Aqrarkredit”ə ötürülməsi üzrə son tədbirlərlə bağlıdır. Üçüncü rübün yekun hesabatına görə, ABB-nin “Fitch” tərəfindən hesablanan birinci dərəcəli kapital adekvatlığı təxminən 11% təşkil edir.
“Fitch” ekspertlərinin rəyinə görə, son bir il ərzində görülmüş işlər nəticəsində bankın aktivlərinin keyfiyyəti əhəmiyyətli dərəcədə yaxşılaşıb və likvidlik mövqeyi möhkəmlənib.
Ölkəmizin müasir dövlət bankı olan Azərbaycan Beynəlxalq Bankının məhsul və xidmətləri barədə məlumatları bankın 36 filial və 40 şöbəsindən, www.ibar.az internet səhifəsindən, 937 nömrəli Məlumat Mərkəzindən, həmçinin rəsmi Facebook səhifəsindən əldə etmək olar.
1news.az