Bakıda nişanlısı tərəfindən zorlanaraq hamilə qalan 16 yaşlı qızla bağlı araşdırma aparılır
“16 yaşa çatmış bir qızın zorlanma faktı cinayətdir. 18 yaşdan sonra da bu cinayət hesab olunur”.
1news.az xəbər verir ki, bu sözləri Sonxeber.az-a açıqlamasında hüquq müdafiəçisi, Azərbaycan Uşaqlar Birliyinin rəhbəri Kəmalə Ağazadə 16 yaşlı qızın nişanlısı tərəfindən zorlandıqdan sonra hamilə qalması xəbərinə münaibət bildirərkən deyib. Onun sözlərinə görə, bu yaş həddinə çatmamış vətəndaşla zorla cinsi əlaqəyə girmək 150.3 maddəsi ilə cinayət məsuliyyətinə cəlb olunur. Lakin, bu məsələdə qızın şikayət verib verməməsi də əsas məqamdır. Bəzən barışıq elan edirlər, könüllülük əsasında məsələ həll olunur:
“Amma ən azından şikayət verilməlidir, hamilə qalıbsa bu təsdiqini tapmalıdır. İstintaq başlayıb və fakt tam sübuta yetirlmədiyinə görə həmin şəxs hələ də azadlıqdadır. Hazırda hadisə ilə bağlı ilkin ibtidai təhqiqat aparılır”.
Hüquq müdafiəçisi əlavə edib ki, qız könüllü olaraq da nişanlısı ilə əlaqəyə girə bilər və qarşı tərəfin də bununla bağlı müyyən sübutları ola bilər:
“Bu məsələ həssas mövzudur. Lakin hər bir halda burada cinsi zorakılıqdan söhbət gedir. Məsuliyyəti çox ağırdır”.
Ailə, Qadın və Uşaq Problemləri üzrə Dövlət Komitəsindən isə bildirilib ki, Bakıda 16 yaşlı qızın nişanlısı tərəfindən zorlanması hadisəsi Komitə tərəfindən nəzarətə götürülüb:
“Hazırda Ailə, Qadın və Uşaq Problemləri üzrə Dövlət Komitəsi Suraxanı rayonunda nişanlısı tərəfindən zorlanan 16 yaşlı qızla bağlı araşdırma aparır. Hadisə ilə bağlı yayılmış məlumat təsdiqini tapdıqdan sonra əlavə məlumat veriləcək”.
Qeyd edək ki, fevralın 11-də Suraxanı qəsəbə sakini, 40 yaşlı A.Q. polisə müraciət edərək bildirib ki, yeni il gecəsi (31 dekabr 2017) onun 2002-ci il təvəllüdlü qızı evlərinə qonaq gəlmiş nişanlısı – 1996-cı il təvəllüdlü Gürcüstan vətəndaşı M.Q. tərəfindən zorlanıb.
Zorlamazdan əvvəl gəncin nişanlısına psixotrop maddə verdiyi bildirilir. Hadisənin üstü bir ay yarım sonra qızın hamilə qaldığı məlum olduqdan sonra açılıb.
Hələlik fakt üzrə heç kim saxlanılmayıb, 31 saylı polis bölməsi fakt üzrə araşdırma aparır.
1news.az